میدیای پارتی: هەر موچەخۆرێک خۆی لە ” هەژماری من” تۆمار نەکات موچەکەی ڕادەگیرێت!.. تاهیر عیسا

ئەمە مانشێتی هەڕەشەکانی چەندبارەی دەسەڵاتی ڕوزەردو زەبونی پارتیی و هاو ئاهانگەکانیەتی کە لەموچەخۆرانی هەرێم دەکرێت.
ناوەرۆکی ئەم مانشێتەو هەڕەشەکانیان، بەڵگەی تاسەرمۆخ نیشاندانی دەسەڵاتێکە کە چەندە دژە ئازادیە هەرەسەرەتاییەکانی خەڵکی کرێکارو زەحمەتکێشە لەکوردستاندا.
بەڵگەی ئەوەیە کە لە بەرامبەر خواست و ویست و بەرژەوەندی زۆرینەی کۆمەڵگادا، زیاتر لەسی وسێ ساڵە سەنگەریان لەخەڵک گرتوەو بەهەر جۆرێک و شێوازێک کە خۆیان ویستبێتیان هەوڵیان داوە خەڵکی کەمدەرامەدی کوردستان لەبەرامبەر خۆیاندا لەو پەڕی زەلیلی و بێ ئیرادەییدا بخەنە سەرئەژنۆ.
لە سەرکوتی هەر ناڕەزایەتیەک کەلەبەرامبەیاندا بۆ باشترکردنی ژیان و گوزەران و دەستبەرکردنی ئازادیە سیاسی و مەدەنیەکانیان، دەستی بۆبرابێت، هەتا ئاستی تەقەکردن و کوشتن و بریندارکردن و کەم ئەندامکردنیان، یان زیندان وئازارو ئەشکەنجە، یان هەڕەشەو چاوسورکردنەوە لە هەڵسوڕاوان و ڕۆژنامەوانان و هەتا تیرۆرکردنیان، کە ئەگەر ناویان لێرەدا بیربهێنرێتەوە لیستێکی دورو درێژی سەدان کەسی لە تیرۆرکراوانی دەستی ئەم دەسەڵاتە دزێوەی کوردایەتی، لەم بابەتەدا دەگرێت.
ئەمە کارنامەی دزێوی ئەم دەسەڵاتە دزو گەندەڵەی ئەم دو بنەماڵە ئۆلیگارشیەی کوردستان و دەستەو تاقمی دەورو بەریان بوە.
هەڕەشەی ڕاگرتنی موچەی فەرمانبەران بەبیانوی پەیوەست نەبونیان بە”هەژماری من” ی ئەوان، کە مەعلومە هەژمارێکە لەپێناو دزی و تاڵانی زیاتر لەلایەک و لەلایەکی دیکەش بەبارمتەگرتنی موچەخۆرانە لەهەژمارێکەوە، کە کۆنتڕۆڵی دان ونەدانی موچە لەژێر دەستی خۆیاندا دەهێڵێتەوە و لەم ڕێگایەشەوە وەک چۆن ئێستا ناوەرۆکی هەڕەشەکە بەڵگەی ئەمەمان دەسەلمێنێت کە دەوترێت موچەکانیان ڕادەگیرێت ئەگەر پێیەوە پەیوەست نەبن، بەهەمان شێوەش ئەگەر موچەخۆران بچنە ژێر باری ویستی ئەوان، سبەینێ لەدەستبردن بۆ هەر ناڕازیبونێک و خۆپیشاندانێک، لەڕێگای هەژماری ئەوانەوە هەڕەشەی موچە نەدان کارتێکی فشاری ئەم باندە دزو مافیاو تیرۆریستە حاکمەی ئێستا دەبێت.
ئەم دەسەڵاتی جوت بنەماڵەییە، کە هەریەکەیان زۆنێکی بۆخۆی ڕەنگڕێژکردووە، هەریەکەی لەقەڵەمڕەوی خۆیدا باشخانێکی پیسی دزی وفەسادی و سەرکوتی ئازادیە سیاسی و فکریەکانی خەڵکی ناڕازی پشت سەری خۆی ناوە، شەرعیەتی ئەم جۆرە لە حوکمڕانییان لەڕێگای پەنجەمۆری خەڵکەوە لەهەڵبژاردنە ساختەکانیاندا، بۆخۆیان بەدەست هێناوە.
ترش و خوێی ئەم ڕێگا پوچەی بەقەول دیموکڕاسیی و فرەیی و پلۆڕالیزمییە، دەرکەوتن وسەرهەڵدانی ناوە ناوەی ئۆپۆزیسیۆنی ساختە بووە، ئۆپۆزیسیۆنێک کە “DNA” کە ی سەد لەسەد لەم دەسەڵاتە دزو گەندەڵە واوەتر نەبوەو نییە. ئەوەی جێگای باسیشە لێرەدا، لێدوانێکی قوباد تاڵەبانییە، کە براکەی، بافڵ تاڵەبانی، لەهەڵبژاردنەکانی خولی شەشەمی پەڕلەماندا، بەسەختی ودژواری بانگەشەیەکی تەفرەئامێزی دەرخواردی خەڵکداو، وای ئیدیعا دەکرد کە دەیەوێت جیاوازتربێت لەسیاسەت و کارنامەی ڕابردوی باوکی و ژیانی خەڵک دەگۆڕێت، بانگەشەی دەستبردن بۆ هەژماری منی وەک کارتێکی هەستیارو کاریگەر لەهەڵبژاردنەکاندا بەکار هێناو دەنگی خۆی بەساختە خستە پاڵ دەنگی موچەخۆران بۆ ڕەتکردنەوەی پڕۆژەی هەژماری مەسروربارزانی، بەڵام دوای دیدارو گفتوگۆکانی لەگەڵ مەسروربارزانی، سەبارەت بەهەژماری من وتی ئەو تێبینایانەی پێشتر بوومە لەسەر هەژماری من ئێستا لێکتێگەیشتنمان بۆ دروست بووە و چارەسەرکراون.
دو ڕۆژ لەمەوبەریش، قوباد تاڵەبانی، لەکۆنگرەیەکی ڕۆژنامەوانیدا ڕایگەیاند، خۆشبەختانە هەمو ئەو تێبینیانەی کەهەبون لەسەر پڕۆژەی هەژماری من یەکلابونەتەوە.
لەڕاستیدا ئەمانە چۆن بای بێت لەوێدا بەو ئاراستەیە شەن و کەوی خۆیان دەکەن، دەنا مەسەلەکە پەیوەست نییە بە تێبێنی و ڕەوینەوەو نەڕەوینەوەی سەرنج، بەڵکو خۆشیان هیچ سەرنجێکیان هەتا پێش دەورانی خولی شەشەمی پەڕلەمان لەسەر هەژماری من نەبو، بەڵکو لە زۆربەی دام دەزگاکانی سلێمانیش بەزۆر فۆڕمی هەژماری من بە موچەخۆران پڕ دەکرایەوە، ئەمەش نیشانەی کەم مۆڕاڵی سیاسیی ئەم حیزب و کەسایەتیانەیە، کە لەبەرامبەر خەڵکدا بۆ تەفرەدانیان دەگیرێتە بەر.
مەسعود بارزانیش چەند ڕۆژێک لەمەو بەر هەڕەشەی لەحکومەتی ناوەندی عێڕاق کرد، کە ئێمە چیتر بەمجۆرە قبوڵناکەین، کە موچە لەکاتی دیاریکراودا نەیەت، ئەو گوتی خۆ ئێمە سواڵکەر نین!
لەکاتێکدا ئەوان بەدەیان ساڵە یاری بە موچەو قوتی خەڵکی کوردستانەوە دەکەن و بە دەیان مانگی موچەی موچەخۆران، یان بەناوی پاشەکەوتەوە خواردوە یان بەلێبڕینەوە یان هەر پێیان نەداون، سەرباری دواکەوتنی موچە هەتا نزیک لەدو مانگیش، کەچی مەسعود بارزانی ڕو بەبەغدا دەڵێت خۆ ئێمە سواڵکەر نین؟
لەڕاستیدا حکومەتی گەندەڵی سودانی و دەسەڵاتی گەندەڵی کوردی دو دەسەڵاتی بۆرجوازی گەندەڵ و دزو فەسادی ناوچەکەن، هەردوکیان بەرژەوەندیەکانیان لێکهەڵپێکراوە و لەیەکتر هێز بۆ حوکمڕانی و دەسەڵات وەردەگرن!
بەڵام، پارتی و بارزانی بەدو کەسایەتی جیاواز لەگەڵ بەغدا هەڵس وکەوت دەکەن، بەواتای دوچاری لەتبونی کەسایەتی هاتون، چونکە هەتا ئێستاش لەناو تەم ومژی ئاڵ وگۆڕەکانی ناو سیستەمی چاوەڕوانکراوی تازەی جیهان و ناوچەکەو ڕۆژهەڵاتی ناویندا بەرچاویان ڕۆشن نییە، پێشتر کە لەسیاسەتی ئابوری سەربەخۆو فرۆشی نەوت و دواتریش بەڵای ڕیفڕاندۆمدا، سەرکەوتو نەبون، دوای ئەوە حکومەتی ناوەند وردە وردە ئەو سەنگەرانەی پێچۆڵکردن، کە پێشتر لە سەردەمی دەسەڵاتی دیفاکتۆییاندا هەیان بو، هەم لەئاستی عێڕاق وناوچەکەداو هەم لەئاستی جیهانیشدا قورساییان هەبو، دوای ئەمەو هەنگاو بەهەنگاو لەبەرامبەر بەغدادا پاشەکشەیان پێکرا.
لەلایەک لە حکومەتی ناوەنددا شەریکن، تا ئەو جێگایەی پێگەی حکومەتی ناوەند لەناو ئاڵ وگۆڕە سیاسی و ئابوری و سەربازیەکانی ئێستای ڕۆژهەڵاتی ناوەڕاستدا، پارێزراو بێت ئەوان بەشێکن لەو حکومەتە، زۆر لەمێژ نییە لەسەرو بەندی دوای ملشکانی ڕژێمەکەی ئەسەدو دەرکەوتنی سیمای تیرۆریستی ئیسلامی ئەحمەد جۆلانیدا لەسوریا، هەڕەشەی ئەوەیان دەکرد لەحکومەتی ناوەندو پەڕلەمان دەکشێنەوە، دواتر ئەو شەپۆلی ئاڵ وگۆڕانە، بەنیازو ویستی ئەوان نەڕۆیشتە پێش و لەم هەنگاوەشدا، شلیان کردەوە، وە هەندێک جاریش تەحلیل و لێکدانەوەکانیان دەیان باتە کەشکەڵانی خەیاڵ پڵاویی و پێیان وایە لەبەرەبەیانێکدا بانگ دەکرێن بۆ لەسەرنانی تاجی دەوڵەتداری و هەڕەشەکانیان دەستپێدەکاتەوە.
پێکنەهێنانی حکومەتیشیان، کە زیاترلە شەش مانگ بەسەر خولی شەشەمی هەڵبژاردنەکانی پەڕلەماندا تێپەڕیوە، هەر پەیوەستە بەم ئاڵ وگۆڕانەی ناوچەکەو دنیاو ناڕۆشنی لەبارەی ئاییندەی دیزاینی تازە و جێگەو پێگەی هێزە ئیقلیمیەکان لەسیستەمی عالەمی تازەدا.
ئەم هەمو ماوەیەش کە حکومەت پێکنەهێندراوە، نیشانەی ئەوەیە، کە لەم هەرێمەدا بون ونەبونی حکومەت هەر وەک یەک وایەو ژیانی خەڵک لەهەردو حاڵەتیدا هەر لەدۆخی خراپیدایە.
دواجار مافێکی سادەو بێچەندو چونی هەر فەرمانبەرو کارمەندێکی موچە خۆرە لەم دنیا پان وبەرینەی سەرمایەداریدا، کە چۆن موچەی کارەبەکرێ و نیوە لێدزراوەکەی لە ڕێگای یەکێک لەو بانقانەی کەخۆی هەڵیدەبژێرێت، وەردەگرێت.
بەڵام لەم هەرێمەی زیاتر لە سیی وسێ ساڵە کۆمەڵێک باندی دزو قاچاخچی کە وەکو مۆتەکە وان بەسەر دڵی خەڵکی هەژارو نەدارو کەمدەرامەدەوە، خۆیان لەڕێگای هێزی میلیشیاو هێزی سەرکوتکەرەوە بەسەر خەڵکی کوردستاندا داسەپاندوەو تەنانەت مافی هەڵبژاردنی ئازادانەی هەژماری بانقیشیان لە موچەخۆران سەندۆتەوە.
خەڵکی زەحمەتکێشی کوردستان، تەنیا لەڕێگای پەیبردن بە بەرژەوەندیە هاوبەشەکانیان لەناو دنیای سەرمایەداریداو تێگەیشتن لەوەی ئەم جیهانەو یاساو ڕێساکانی، هەر لە کاری کرێگرتەو زێدەباییەکەی کە لەڕەنج وهێزی ئەوان دەدزرێت و دەچێتە گیرفان یان قاسەی سەرمایەدارانەوە، هەتا ئەو یاسای مڵکداریەی کە تەواوی هۆکارەکانی ژیانی کۆمەڵگای خستۆتە ژێر دەستی مشتێک لە ملیادلێرە ناوچەیی و مەڵتی ملیاردلێرە جیهانیەکان، تێگەیشتن لەوەی ژن بم یان پیاو ڕەش بم یان سپی جوبم یان موسوڵمان یەزیدی بم یان گاور، کوردبم یان عەڕەب، لە لێکهەڵپێکانی بەرژەوەندیەکان و بەریەککەوتنەکانی بەرژەوەندیەکانەوە، دەتوانین بزانین کێ هاوچارەنوسەو کێش نەیار، دەتوانین تێبگەین لەوەی کە دەبێت بۆ وەستانەوەمان لەبەرامبەر ئەوانەی لەگەڵ ویست و خواست و بەرژەوەندیەکانماندا ناکۆکن، پێویستمان بە هاودەنگی وهاوخەباتی هەیە، هاودەنگیەک کە لەو تێگەیشتنە سەرچاوەی گرتبێت، کە نیزامی سەرمایەداری ئەمڕۆ چۆن ژیان وگوزەران و خۆشی و بەختەوەری و ئازادیە سروشتیە مرۆڤئاساییەکانمانی لێ لەقالب داوین و لەڕۆبۆتێک واوەتر کە دەتوانێت تەنیاو تەنیا لەو تەمەنە مەحدودەی کەمرۆڤ لەناو گەردوندا وەک یەکەیەکی بایۆلۆجی سەری دەرهێناوە، کەڵک لەوزە و حەوسەڵەمان وەرگرێت، لەپێناوی کەڵەکەکردنی هەرچی زیاترو زیاتری سەرمایەدا، هاودەنگیەک بۆ ئەوەی ئەگەر نەشتوانین لای کەمی ژیانێکی دڵخوازی خۆمان بۆخۆمان بەدەستبهێنین، بەڵام هەمیشە بونمان لەناو ئەم دنیا پڕ ململانێ چینایەتیەدا، بە پێی ڕێژەو کەمی و زۆریمان لە ڕوبەڕوبونەوەو نەبەردیەکانماندا، دەتوانێت وەک فاکتەری پارسەنگی هێز بۆ باشتر کردنی ژیانی ئێستاو ئاییندەمان کەم وزۆر دەور ببینێت، هەر پەوپێیەی دنیای سەرمایەداری ئەمڕۆ سەر باری سەرهەڵدانی چەندین قوتبی جۆراوجۆرو ململانێیان لەسەر هەژمون و بەشیان لە دیزایێک کە لەپارسەنگی هێزی ئابوری و سەربازیدا دەتوانێت لەساتە وەختێکدا لەنگەر بگرێت، بەڵام لەناوەرۆکدا سەرجەمیان لەسەر ئەوە ساغن، کە لەباشترین حاڵەتیاندا بەبەڕبەڕیانەترین شێوازی چەوساندنەوە، لەهێزی کاری هەرزانمان کەڵک وەرگرن، هەندێک جاریش واپێویست دەکات لەجەنگی ململانێی هەژمونگەراییاندا، بە ملیۆنانمان لێ بەکوشت بدەن و بەملیۆنانیشمان لێ بریندارو پەککەوتەو ئاوارەو سەر گەردان و بێماڵ وحاڵ بکەن، هەر بۆیەش تێگەیشتنێک بەدەر لەم تێگەیشتنە جیهانداگرە، ناتوانێت ئاکامێک لەخەبات و تێکۆشانی ئەم زۆرایەتییە مرۆییە، بەتەنیا لەناوچەیەک و وڵاتێکدا گرێ بخوا، سەرمایەو بەڵاکانی گەردونین، دەبێت خەبات و تێکۆشان و نەبەردیەکانیش گەردونی بن، ئەمەیان چۆن و بەچ شێوازو بەکام میکانیزمی کارسازو گونجاو دەڕواتە پێش، بە ئاگایی و وشیاری ملیاریی نێونەتەوەیی بەرهەمدار دەبێت، بۆ ئەمەش تەنیا کات دەوری یەکلاکەرەوەی دەبێت، لەناو کاتیشدا بەبێ ویست و ئیرادەی من وئەم وئەو یان ئەم تاقم و ئەم حیزب و ئەم ڕێکخراو، جوڵانەوە و بەریەککەوتنە چینایەتیە ناکۆکەکان، لەپڕۆسەیەکی دورو درێژی لە نەوەستان نەهاتودا، ماتریاڵی مرۆیی ئاگامەند وەک فاکتەری ئاڵ وگۆڕی بنەڕەتی لەم دنیا پڕ لەنەهامەتیانەدا بەدیدەهێنێت. بەدەر لەمەش دەکرێت ڕوداوهای جۆراوجۆری دیکەی وەک کۆمۆنەی پاریس و شۆڕشی ئۆکتۆبەرو شۆڕشی چین و ئینقلابی حەفتاو نۆ لەئێران و دەیان سەدان ڕوداوی لەم جۆرە ڕوبدەن، بەڵام لەنەبونی وشیاری و ئاگایی چینایەتی سیاسی ئابوریدا، حەتمەن ئامانجەکانیش بەدینایەن.

تاهیر عیسا
20.05.2025

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.