Skip to Content

132 Views

J + M    =  10 …    سه‌ردار جاف

J + M = 10 … سه‌ردار جاف

Be First!
by July 2, 2019 General, Poems
image_print



كه‌ جێم دێڵی
تاریكی ده‌بێته‌ پرچه‌قه‌ترانییه‌كانت و به‌ ده‌م شنه‌ی شانه‌ی په‌نجه‌كانمه‌وه‌
ده‌ئاڵۆسكێ
وێنه‌ ڕه‌نگینه‌كانت نمایش ده‌كا
تریفه‌ی مانگ ڕه‌نگی كوڵم و
ئه‌ستێره‌یش به‌ چاوه‌كانت
هه‌ر له‌ گزنگی تارمایی
باڵات ده‌كاته‌ وه‌نه‌وشه‌و
گه‌ردنی لامل كریستاڵ
خه‌ون ده‌نگت ده‌هه‌ژێنێ و
ڕابوونی ته‌م له‌نجه‌كانت
كه‌ جێم دێڵی
بۆ خۆیشم نازانم له‌ چ مه‌مله‌كه‌تێ ده‌خولێمه‌وه‌…..
بای باوه‌شێنی هه‌ناسه‌ت
مناڵێكی ئه‌وك پڕی گریانمه‌
ونبوونێكی بێ سۆراغمه‌
ده‌رگای ماڵی نامۆبوونم
شێوه‌ ڕووخسار له‌ خه‌یاڵم ساتی چێژ به‌خشی ژانمه‌
ده‌بنه‌ كه‌نار … قوڵایی ناخی پڕ حه‌سره‌ت
ڕاموسانه‌كه‌ی گاردرمۆین هێشتا شێتێكی سه‌راسیما ونبوونمه‌
ته‌پڵی شه‌ڕی ئیشقم ده‌كوتێ
جارێ زووه‌ ئه‌و برین و ژانه‌ كێمی نه‌كردووه‌ و قه‌تماغێكه‌ و
له‌ قه‌راغمه‌
كه‌ جێم دێڵی
جامی شه‌رابی ژیانم هه‌رگیز وه‌ك ئێستا نه‌شكاوه‌
به‌ بارته‌قای ونبوونی تۆ
شێت بوون به‌ باڵام ئاڵاوه‌
تۆ ده‌زانی
شه‌رم پێشتر وه‌ك ئه‌مێستا دای نه‌گرتم
خه‌میش نه‌بووه‌ خانه‌خوێی ماڵی شێواوم
چركه‌ی ته‌مه‌ن نه‌بووه‌ تاڵاوی ژه‌هر نۆشینم
نه‌نرا به‌ شه‌وی به‌راتم
كه‌ جێم دێڵی
چركه‌ی وێنه‌ی دیمه‌نه‌كان
جێ په‌نجه‌ی تۆیان گرتووه‌
نیگاكانم له‌ خه‌یاڵدانێ هه‌ڵده‌فڕن
له‌ نیگای چاوم بۆ سینه‌ت
كه‌شتی حه‌زم مت مت بووه‌ و
ڕایگرتووه‌
كه‌ جێم دێڵی
یاده‌كانت ده‌بنه‌ سه‌ره‌تاتكێی خه‌مم
ده‌بنه‌ مۆرانه‌ی نێو جه‌سته‌ و
بیری جه‌نجاڵی نێو سه‌رم
ئای كه‌ ژانێكی پڕ له‌ سوێی
دوا فه‌رهه‌نگی ئیشقمی و دوا ترپه‌ی ته‌مه‌نی ڕێمی
جگه‌ له‌ تۆ
هۆگری شه‌وی هیچ ژنێكی تر نابم
ده‌پێم بڵێ
به‌ره‌و كام لا بۆ ده‌روازه‌ی پڕ له‌ هه‌توان
په‌نا به‌رم
كه‌ جێم دێڵی
وا نه‌زانی
ده‌م شڕێكی سه‌ر شه‌قام و نێو كۆڵانم
په‌نهانییه‌كانی نێوانمان
ده‌بنه‌ سه‌ربورده‌ی من و گڵ
ئه‌زیزه‌كه‌م
ئیتر مه‌حاڵه‌ له‌ دوای تۆ
ڕێگای ئیشقێكی تر بگرێ
چاو و هه‌ناسه‌ و بیر و دڵ

27 / 6 / 2019

سه‌ردار جاف
ئه‌ڵمانیا

Previous
Next

Leave a Reply