Skip to Content

بڕوا بەخۆبوون … عەلی حەمەڕەشید بەرزنجی

بڕوا بەخۆبوون … عەلی حەمەڕەشید بەرزنجی

Closed
by January 20, 2020 General, Kids Literature


حەزم دەکرد باخچەی گەڕەک
خۆشترین جێی ئەو نــاوە بێ
پڕ چیمەنی ســەوز و جوان و
بە دار و گـــوڵ ڕازاوە بێ
بۆ یاریی و حـەوانەوەمــان
گشت کـات دەرگەی کراوە بێ

یەکەم ھەنگاو دەستم پێکرد
بەرنامە بوو بۆ ئەو کــــارە
وتم تەنیا ئاســـــان نییە
زۆر پێویستیم بە ھاوکـــارە
کەوتمە راوێژ لەگەڵ باوکــم
وەک ھاوڕێ واین، ئەندازیارە

کە باخــــەوانی باخچەکە
بەم ھەڵوێستەی ئێمەی زانی
ھــات و پێشوازی لێکردین
بەدڵخۆشی و شادمـــــانی
وتی ھەرچی بە مـن بکـرێ
ئامــــادەم بۆ پشتیوانی

ئیتر لەگەڵ ھاوڕێکــــانم
بەدڵسۆزی دەست بەکار بووین
بەھاوکـاری خەڵکی گەڕەک
وەک تیمێکی چالاک دیار بووین
خـەریکی کێڵانی باخچـە و
رواندنی گوڵ و دار بـــووین

باخچەکەمــان ھێندە جوانکرد
لــــەو نــــاوەدا دەنگی داوە
ئاواتەکـــەشم ھــــاتە دی و
سـەربەرزیش بووم بەو ھەنگاوە
زانیم کــــە بڕوا بەخـۆ بوون
بۆ ســەرکـــەوتن تین و تاوە

١/١٢/٢٠١٦

Previous
Next