Skip to Content

510 Views

دوو شيعرى جەلالی میرزا کەریم

دوو شيعرى جەلالی میرزا کەریم

Be First!
by August 14, 2017 General, Poems
image_print

ڕێگا

نامە داخراوەکانی دڵ
لە تەوژمی خۆشەویستی لێوی بەفری
تابلۆی شانۆی خۆرهەڵاتی ڕیگاکانا
ئەکرێتەوە
لە کاروانی گەڵاڕێزانی پایزی گوڵا
لەزستانی سنگی هەورا
هەمان وەرزی نمەی بەهار
بەسەر لووتکەو
قەدپاڵ و نشێوەکانا
ئەڕژێنەوە.
* * *
سێبەری باڵدارێکی بێ پاسەپۆرتی
سەرهەڵگرتوو
بەندەرەکانی زریانی
وەیشوومەی شەوی هەڵتەکان
هەناسەی گەرمی هێلانەی
گەرووی خواروو
بووە ملوانکەی ژیلەمۆ و
لە گەردنی نەرمی وەک لۆکەی خۆی ئاڵان.
* * *
-ئەی باڵەکانی پرشنگی خۆری وشە!
بەستەڵەکی دەمارەکانی بێ دەنگی
جێ مەهێڵن
پەردەکانی پەنجەرەی زامی بێ گرشە،
بە دواتانا .. لاشەی زەوی
وێڵ ئەکێڵن.
* * *
کێ ئەیزانی ؟..
جانتایەکی خۆڵ لێنیشتووی ماندووی ڕێگای
مەڵبەندێکی دووری کەساس ..
ئەگاتە بەردەمی پاسگای تەمی تەکساس
ڕەهێڵەی بارانی خۆری،
تۆزی سەر ڕووی ئەشواتەوە..
گوێزانی برووسکەی دڕی،
دوگمەی سینگی ئەکاتەوە
کۆ ئەیزانێ؟؟
* * *
کێ ئەیزانێ ؟..
نینۆکی درێژی ئەوسای مەلای خەتێ
لەدووتوێی ئایەتەکانی ناو قورئانا
سەروچاوی یەزدان ئەڕنێ
هەمان و هەمان پەنجەی تر
لەبەردەرگای کۆشکی سپی و
سوور و سەوزی (ڕەشا) ئەدڕی.
* * *
نەوەک هەور،
کەسەرچاوەی خۆی ئەزانی
نەوەک .. ڕاچڵەکینی تەور
کە مەچەک و
بازووی کاوەی خۆی ئەزانێ
نەوەک .. ڕەنگی ئەرخەوانی
گۆڕستانی پێشمەرگەکان،
کە لافاوی
ڕێی خوێنینی خۆی ئەزانی
بەڵکو ئێوەش
گەورەکانم،
ئەتانزانی.
* * *
ئەتانزانی پەری ئاوات،
لەکەژاوەی دڵدارانی ئاوارەوە
نەبێ .. نایەت.
ئەتانزانی .. کەشتی شادی،
لەڕۆخی زامی دەریاوە
نەبێ .. نایەت
ئەتانزانی .. خۆر لە چرکەی
پەلەپیتکەی تفەنگەوە
نەبێ .. نایەت.
ئەتانزانی .. شنەی ئاڵا لەناو ڕێژنەی
ڕاستبوونەوەی سێدارەوە
نەبێ .. نایەت.
* * *
پۆستەرێکی ناوچەوانی هەواڵنامەی
بێ کۆتایی هاوارێکی ڕووت و برسی
دەنگ و باسی “کۆماری ئیفلاتوون” ی لە
گالیسکەی هاوین و قژی
بێ قردێلەی گوڵەگەنمی ئەپرسی.
پەپوولەکانی سەرابی مۆمێکی کوێر.
چین چین بەنێو ڕەنگەکانی
تابلۆی تراژیدی پرسا گوزەریان کرد
مەشخەڵی بەرپێی ناسۆریان،
ئیتر سەرەتای توولەڕێی
بەرەو عیشق دەستی پێ کرد.
1979


تەمەنی دەساڵەی دێڕێک

چەپڵە ڕێزان..
نمەی چاوی ئاسمانێکی پڕ لە گریان
بەسەر یادی ڕاچەنینی شارەکەما
ئەبارێنن ..
دروشمە بەخوێن تەڵخەکان..
سەرەنێزە مەدالیای بەهرەی تاوان
بەبەرۆکی قارەمانی مێژووەکەما
ئەچەقێنن
سروودی سەروەختی زاری ڕیاکاران
وەکو سنگی زبری هەوری ڕەشی زستان
نیگای چاوی ئەستێرە لە وەرزی خەما
ئەپرووێنن
ڕۆژنامەکان
کامێرا چاوچنۆکەکان
میکرۆفونی وتاربێژە درۆزنەکان
هەموو ڕۆژێ لە فەرهەنگی
ناوودەنگی
دلێرانەی شۆڕشەکەما
باڵی وشە
زاری وتە
ئەقرتێنن.
* * *
وا .. دەساڵە چاوی هیوا
گڕ ئەڕێژێ
وا .. دەساڵە چەکی بڕوا
تۆوی خۆزگە
لەناو زامی
سەنگەرەکانا ئەنێژێ
هەتا ساوای سەر بێشکەشمان
ژەکی خەم و ژان ئەچێژێ.
* * *
خەونی شاری حوزەیرانمان
کەی کەژاوەی گڕ و خوێنی بەڕێ ئەکرێ
جارێکی تر .. شەهیدانمان
کەی پێ ئەگرێ
کفن ئەدڕێ
ڕائەپەڕێ.
* * *
منداڵێکی لەدایک بووی قریشکەی قوڕگی خنکێنراو
لە پێشمەرگەیەکی پرسی..
کەی هەنسکی،
دەساڵەی دایکم بەرئەگرێ؟!
* * *
تفەنگ گریا:
” وا .. دەساڵە .. خەرمانی خوێنمان شەن ئەکەن”
هەزاران چاوی ڕەنگ گریا
” وا .. دەساڵە .. کانیی وشەمان بۆگەن ئەکەن”.
* * *
پێشمەرگەیەک لە شاعیرێکی نوێی پرسی
کەی شیعرێکم بۆ ئەنووسی
پشکۆی ئاگردانی زامم هەڵگیرسێنێ
لەشکری خەم بورووژێنێ؟!
* * *
هاژەی یادی دەساڵەی شاعیر .. چرپانی !!
جارێ ئەمساڵ .. هۆنراوەکانم ئەدڕێنم
چونکە زاری وشەکانی
بێ گوللەیە..
بێ گوللەیە..
چونکە سنگی دێڕەکانی
بێ نەڕەیە ..
بێ نرکەیە ..
* * *
چاومان ..
چاومان ، هەموو ڕۆژێ بەدوای ڕێگای ژانی
کوردستانی
لەت کراودا .. هەنگاو ئەنێ
ناومان
هەموو ڕۆژێ لەسای شین و قوڕپێوانی
هەتیوانی
بێ ناونیشان .. خۆی ئەڕنێ.
* * *
“سێبەری تەرمی مردووان بەخوێن بشۆن”
سەرهەڵگرن .. بڕۆ .. بڕۆن”.
* * *
دڵدارەکەم .. دوای خوێندنەوەی.. ئامۆژگاری
ڕێکخەری شار..
وتی : بۆ کوێ .. سەرهەڵگرم ..
قوڕگی کام نەهەنگی تاری
دەریای شەوگار
بەسەوڵی پرچم هەڵبدڕم.
* * *
مەلا بانگدان .. هێشتا دووکەڵ ..
لە ئاسۆدا گرێی ئەدا داوی مەتەڵ
تارمایی شۆڕەسوارێکی باڵا ئاگر..
لەناو دۆزەخی هەزاران پرسیاری کوێرا خۆڕاگر
شریخەی قامچی وەشانی
وەک گۆرانی
ئەیووت .. سەرهەڵگرن .. برۆن ..
جارێکی تر سەنگەر بەخوێن .. بەگڕ .. بشۆن .

Previous
Next

Leave a Reply