Skip to Content

60 Views

دەنگدەرو هەڵبژێردراو…کامیان خزمەت بە کامیان دەکات ؟! … موزەفەر عەبدوڵا

دەنگدەرو هەڵبژێردراو…کامیان خزمەت بە کامیان دەکات ؟! … موزەفەر عەبدوڵا

Be First!
by April 22, 2018 General
image_print

چەند ڕۆژێکە پڕوپاگەندەی هەڵبژاردن لە لایەن دەستەو تاقمە قەومی – خێڵەکی و دینی – تایەفی و کاندیدەکانیانەوە لەسەراسەری عیراق، بە کوردستانیشەوە ،دەستی پێکردوە بۆ هەڵبژاردنی ئەندامانی پەرلەمانی عێراق.
هەڵبەت ئەمە یەکەمجار نی یە، ڕەنگە دوا جارێش نەبیت ، کە ئەم زەلکاوەی دروستیان کردەوەو پێی دەڵێن پەرلەمان ، دەنگدانو هەڵبژاردنی تیا بەڕێوە دەچێت تا چەند سەد کەسێک لە فاسدترین سیاسی و تاوانبارەکان دەنگیان پێ بدرێت و ببنە ئەندامی بەناو پەرلەمانو تا چوار ساڵی تر خەریکی دزیو گەندەڵی و سەرکوت بن.
هەر کەسێک ئەگەر سەرنجێک لە پروپاگەندەو قسەو باس ،و تەنانەت تەماشایەکی بیوگرافی و کارنامەی زۆربەی کاندیدەکان بدات ئەوە ڕادەی ڕیسوایی ئەم هەڵبژاردنەی بۆ دەردەکەوێت. دەردەکەوێت ئەوانەی خۆیان بۆ ئەم هەڵبژاردنانە کاندید کردەوە بە لەبەرچاگرتنی دەسەڵاتی ئەم دوو سێ دەدەیەیەی ئەم دەستەوتاقمانە ئەوە ئاشکرا دیارە کە ئەمانە بە شوین چ مەبەستێکی قێزەونەوەن.

ئەم کاندیدانەو سەرانی حزبەکانیان لە بانگشەکانیان سەروبنی قسەکانیان ئەوەیە کە ئەوان لە خزمەتی خەڵکدانو بۆ شەری خزمەتی خەڵک خۆیان کاندید کردەوە ودەیانەویت ببنە ئەندام پەرلەمان.هەمویان بە ڕاستو چەپەوە لیستی درۆو تەفرەدان ڕیز دەکەنو هەزارو یەک بەڵێن دەدەن کە ئەوان لە خزمەتی خەڵکدان.
بۆیە هەقە خەڵکی ستەمدیدەو بێبەشو هەژارو نەدار لە کریکاران ،بێکاران. مامۆستایان ،کارمەندانو تویژە کەمدەرامەدەکان ،کە بە نیازن دەنگ بدەن ، ئاوڕێک لە دەنگدانەکانی پێشوتر بدەنەوەو لە خۆیان پرسیار بکەن ئاخودەنگدەرو هەڵبژێردراو بە فعلی کامیان خزمەتی کامیان دەکەن؟ !

دڵنیام هەر بە چاوپیاخشاندنێکی خێرا بە پرۆسەی دەنگدانو هەڵبژاردنەکانی پێشوو بۆیان دەدرکەوێت کە دەنگدان بۆ هەڵبژاردنی چەند سەد کەسێک لە نوێنەرانی ئەم دەستەو تاقمە قەومی – خێڵەکی و ئیسلامی – تایەفیانە تەنها دەبێتە خێروبێرێکی گەورە بۆ ئەو نوینەرانە کە دەبنە ئەندام پەرلەمان تا چوار ساڵی تر. وە تەنها کاریان دزی و گەندەڵیو پێشلکردنی هەمو مافو ئازادی یەکانی جەماوەری دەنگدەری ستەمدیدە دەبیت . چونکە ئەمە ناوەرۆکی پەیامی ئەو دەستورو یاسایانەیە کە پەرلەمانو حکومەتو هەمو دامەزراوەکانی ئەم دەوڵەتەی لەسەر بنیادنراوە.
دەستورو یاسایەک کە خەڵکی دابەش بکات بەسەر دەستەو تاقمی قەوموخێلو دینو تایەفەوە هەرگیز لە سایەیدا هیچ نوێنەرو هەڵبژێردراوێک ناتوانێت بە یەکسانی لەخزمەتی هەمو خەڵکدا بیت.

پێویست بە شیکاری و لێکوڵینەوەی سیاسی ورد ناکا لەسەر دەستورو یاساو ململانێی سیاسیو فکری ئەم دەستەو تاقمانە. چونکە لە ماوەی ١٥-٢٠ساڵی ڕابردودا خەڵک بە کردەوە تا سەر ئێسک تاڵی دەسەڵاتی ئەمانەیان چێشتوە. تەنها سەرنجی کاروکردەوەی ئەم تاقمانەو نوێنەرو کاندیدەکانیان بکەیت ئیتر ئەو ڕاستی یە دەرکەوێت کە دەنگدەرو هەڵبژێردراو کامیان خزمەت بە کامیان دەکات .

هەر هەڵبژێدراوو ئەندامێکی پەرلەمانی عێراق و کوردستان، تەنانەت شەریفترنیشیان لە ڕوانگەی خەڵکەوە ،دەبینین لە ماوەی ئەو چوار ساڵەدا ،ئەگەر پێشترهیچیشی نەبوبێت ،ئەوە دەبێتە خاوەن کۆشکو تەلارو باخو ماشینی دوا مۆدیل و چەندین کۆمپانیاو چەند ژنێکیش دەکرێت لە سایەی بەرەکەتی یاسا فرە ژنە قیزەونەکانیان.وە لەم چوارساڵەدا چەند خزمێکی خۆشی دەکات بە پاسەوانو جانتاهەڵگریو موچەیەکی باشیان پێ دەدرێت .

بەڵام هەمو ئەو خەڵکانەی تر کە دەنگیان داوە تەنها شەڕو کارەساتی ئەم دەسەڵاتەو نوێنەرەکانیان پێ دەبڕێت.ئیتر هەرلە کارەساتی بێ موچەیی ، بێ کرێی ، بێ ئاوو کارەبایی ، بێکاری و بێخانەو لانەیی و دابین نەکردنی دەیان و سەدان پێویستی و مافی تر تا دەگاتە بون بە قوربانی نێوان کێشەو ململانێ و شەڕی ئەم دەستەوتاقمانە لەسەر دەسەڵاتو دزی و گەندەڵی.

بۆیە بە بێ گوێدانە هێج بەهانەیەک کە دەڵین ئاخر ئەگەر دەنگ نەدەین بدیل چی یە؟یاخود ئەگەر دەنگیش نەدەین ئەم حزبانە خۆیان لە جیاتیان دەنگد دەدەن؟! یاخود ئیتر ئەمە دەنگدانو هەڵبژاردنی دیموکراسی پەرلەمانی و مافی خەڵکە دەنگ بدات؟! یاخود ئەم دەنگدانو هەڵبژاردنە باشترە لە موبایەعەکەی سەدامو بەعس؟!دەیان بەهانەی پوچی تر. بەڵام دەنگنەدانو ڕیسوا کردنی ئەم گاڵتەجاری یە هەڵوێستی سیاسی بە کردەوەی دژی ئەم دەسەڵاتەیە لە ئاستی کوردستانو عیراق.
وەهەر بەم هەڵوێستەش ڕێگا خۆش دەبێت تا خەڵک یەکگرتو بن وەک بەدیل بەرامبەر دەسەڵات دەرکەون .

١٩-٤-٢٠١٨
موزەفەر عەبدوڵا

Previous
Next

Leave a Reply