جۆلانه‌ی حه‌سره‌ت … ستار ئه‌حمه‌د
به‌رائه‌ت نه‌شئه‌ی كۆڵمی خۆر ده‌ناسێ
گوناهه‌كان به باران نه‌بێت
رووی ئاڵی تۆ جێ ناهێڵن
كچێنیت له كازیوه پرسیار ده‌كا
له تاڵی رۆژگاره‌كان نه‌زاكه‌ت ده‌چنێته‌وه
ئه‌و سێبه‌ره‌ی بوونی تۆی له خۆ گرتووه
ئه‌مڕۆ به پاژنه‌ی هه‌نگاوه‌كان ناسرێه‌وه
شه‌وه‌كان ئالووده‌یی رۆژگار
له باوه‌شیانا ناسره‌وێت
ئاسمان تاقانه له نامۆیی خۆی ده‌ڕوانێت
به‌قه‌د ته‌نهاییت
بێگه‌ردیتیان له ته‌وێڵت هه‌ڵكۆڵیوه
چه‌ندین داری ئه‌م بناره
به‌ری نه‌فره‌تیان گرتووه
ده‌سته‌كان له ئاستی نیازتا بوونه كۆت
ماكی خه‌مۆكیان له ناختا چاند‌و
قژی قه‌یره‌ییان داهێناوه بۆت
ئه‌و ده‌مه من نه‌بووم
له بێشكه‌ی حه‌سره‌تا بۆت بگریم
نه‌مده‌توانی بزانم سنوور‌و په‌یوه‌ست
له كوێوه هاتووه
بۆ ناوت له به‌زم‌و بالۆره‌كان پێكهاتووه
ئه‌مڕۆش منی پیاو، باوكی سته‌م‌و
تۆوی سێكس‌و تامه‌زرۆی له‌شی نه‌رم
هه‌سانی خرۆش‌و
كێردی تاوان‌و
خه‌نجه‌ری زه‌بر‌و زه‌نگ
موریدی عاشقان‌و
خۆراكی هه‌ڕه‌شه‌و به‌ره‌ی جه‌نگ
په‌ییم به‌زامی چه‌ند ساڵه‌ت بردووه
بۆ مافت پێنووسم له خوێنا ئاڵ‌و واڵایه
بوونی تۆ كوردستانێكی كه‌سك‌و
جوانترین ئاڵایه
ستار ئه‌حمه‌د
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
