Skip to Content

حەسەن سوورمە ، خۆشەویستی و ڕەسەنایەتی.. سارا فەقێ خدر

حەسەن سوورمە ، خۆشەویستی و ڕەسەنایەتی.. سارا فەقێ خدر

Closed
by كانونی یه‌كه‌م 18, 2022 General, Literature


کەڕۆمانی حەسەن سوورمە دەخوێنیتەوە ، ھەست دەکەی ڕووداوێکی سروشتی و جیاواز دەبیستی . نە لاسایی و نە زۆر لەخۆکردنی تێدایە .
زمان/ وەک ئاوی ڕەوان ، وەک سیوادی بەیانییان ، وەک ئاوازی ڕەسەن ساف و بێ گرێ و گۆڵ . وات لێدەکا دەستی لێ ھەڵنەگری . وەلێ جار ..جار پێویستی بە پەراوێزێک ھەیە بۆئەو وشانەی ناوچەیین، وەک (تەقیە ،مەکروف ،چەپاڵە ،قوشقی ….ھتد )
سەرەڕای ئەوە ژمارەیەک وشەی عەرەبی تێدایە کە بەرامبەریان بەکوردی ھەیە . بۆیە پێویست ناکا بەعەرەبی بنووسرێن وەک (موشکیلە ، وەسایلی حەللاقی ،تەڕەف ، سادق ، حاڵەت ھتد…)

خۆشەویستی / بەسروشتی خۆی ھەڵگری ململانێیە. لەڕۆمانی حەسەن سوورمەدا ھەستی ڕاستەقینەی ھەڵقوڵاو لەباوەڕی کۆنی کوردەواری ، لەگەڵ داب و نەرێتی بارکراو بە باوەڕی سەپاو یان ھاوردە لە ململانێ دان .
پاڵەوانەکانی ڕۆمانی حەسەن سوورمە زۆربەیان ئاشقن .کەسایەتییەکی زەردەشتییانەیان ھەیەلە حەسەن سوورمە و بەس چۆلەکەوە بیگرە ھەتاسوڕەییا و موسا و ھەتا عیشقی سۆفیانەی سەڵاواتی.! زۆربەیان خاوەن زەینی پاک و گفت و لفتی شیرینو ئەتواری جوانن .، بەڵام ھەندێ جار دژەکانیان ناچاریان دەکەن ئاراستەی ھەنگاویان پێچەوانە بێ .
درک و لاینگیری حەقیقەت لە ترۆپکدایە دەشزانن یاخیبوون و قوربانیدانی گەرەکە . حەسەن سوورمە لەپێناوی ھەموواندا ژیا و ماندوو بوو بەس چۆلەکە خەمی دنیای قووت دایەوە لەپێناوی لایەنگیری راستی و لەنێوان بەرداشی سەلامەتی ڕۆڵەکانی و ئەوەش کە لەدەورووبەری ڕوویدەدا .
زارا لەپێناوی پاراستنی شکۆی خێزاندا تەنیایی ھەڵدەبژێرێ و درۆ لەگەڵ خۆیدا ناکا . . مووسا سەرەڕای ئەو ھەموو حەز و ئارەزووانەی، خۆشەویستییەکی ڕاستەقینەشی بۆ سوڕەییا ھەیە . سوڕەییاش بە ھەمان شێوە بەڵام لەکۆتاییدا پێ لەجەرگی خۆیان دەنێن و لەپێناوی سەلامەتی و مانەوەی یەکتردا، دەست لە حەزەکانیان ھەڵدەگرن و خۆشەویستییەکی رۆحی بۆ ئەبەد بە غەمگینی دەیانھێڵێتەوە !
خۆشەویستی نیشتمان و نەتەوەش بەتایبەت چینی چەوساوە و بەشخوراو ، ئاوێتەی دەروونی مووسا و زۆربەی کاراکتەرەکانی دیکە بووە ( چی وێنە و سروودی شۆڕش ھەبوو، ھەست و ڕوانینمی داگیر کردبوو .ئاخر دڵمان زۆر بە پێشمەرگە خۆش بوو ، ئۆخەیمان بەپێشمەرگەی پارچەکانی دیکەی کوردستان دەھات)

ڕەسەنایەتی/ ھێند سادە و جوان ڕەنگی داوەتەوە ، ئارامی بەخوێنەر دەبەخشێ . دڵ گەورەیی، لەخۆ بووردەیی، گیانی ھاوکاری، ژیانی سادە و خواردنی تەندروست،مرۆڤ دەبەنەوە باوەشی سروشت و لەجەنجاڵی ژیانی ڕووکەش ودەمامکداری شار دووری دەخەنەوە، میھرەبانی بەھەموو کون و کەلەبەرێکی ژیاندا بڵاو بۆتەوە لەھەمووی گرنگتر ئەوڕێزەیە کە لە ژن گیراوە ، ئەمەش ڕەگەکانی دەگەڕێتەوە بۆ سەردەمی زۆر دێرین (کە بەس چۆلەکە قسان دەکا ، حەسەن سوورمە ھەموو گیانی دەبێ بەگوێ ) ئەم کلتوورە ئێستا پێچەوانە بۆتەوە ! کێشەی زۆربەی ژنان گوێ لێنەگرتنیانە لەلایەن پیاوانی خێزانەوە .
لەلایەکی دیکەوە سەڵاواتی دوای مردنی دایکیان ،خۆی دووکچە بچکۆلەکەی دەشوا بێئەوەی بەنەنگی بزانێ و فشاریان لێ ناکا کە دەبێ زارای کچی حەسەن سوورمە بیانشوا .
ئەمەش بەو مانایە نییە کەھیچ توندوتیژییەک بەرامبەر ژن لەئارادانەبێ .
کۆتایی ئەم ڕۆمانە سەروبەندی ڕاپەڕینە و ئومێدی ژیانێکی نوێ بەگوێی خەڵکدا دەدا و ژمارەیەکیان بەھەواڵی مان و بەیەک گەیشتنەوەی ئازیزانیان شاد دەبنەوە . ئەمەش ھەوێنی ئارامی و ئاسوودەییە بۆ خوێنەر .

• حەسەن سوورمە یەکەمین ڕۆمان و نوێترین بەرھەمی شاعیرو نووسەر( بەکر ئاڵەیی) یە لە دوو توێی ١٦٠ لاپەڕەی قەبارە مامناوەند و لەساڵی ٢٠٢٢ لە(خانەی موکریان بۆ چاپ و بڵاوکردنەوە) لەھەولێر چاپکراوە .

سارا فەقێ خدر
تشرینی دووەمی ٢٠٢٢

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next