تلیاکخـۆر.. کورتە چیرۆک.. شەماڵ بارەوانی
بە بێدەنگی و شپڕزەییەوە لە لێواری شەقامەکە دانیشتبوو و سەری خۆی بەسەر کۆشی خۆیدا شۆڕکردبووەوە.
هەرچی بەوێدا ڕەت دەبوو، پێنجسەد یان دووسەدوپەنجا دینارییەکی بۆ فڕێ دەدایە بەر پێیەکانی!
ئەو، بەو کارە و پارەفڕێدانەی خەڵکەکە، تا خودا حەز بکات قەڵس و بێزار ببوو.
ئەوەی وەکو بێڕێزی و سووکایەتییەک بۆ خۆی دەبینی.
گەرچی لەژێر لێوەوە دەیگوت: تکایە من سواڵکەر نیم. بەڵام هیچ یەکێک لەوانەی ئەوێ گوێبیستی ئەو قسەیەی ئەو نەدەبوون.
سەرەنجام حەوسەڵەی ئەو پارەفڕێدانەی خەڵکەکەی نەما و هەستایە سەر پێ و پڕبەگەرووی گوڕاندی: سەدجار بڵێم کە من سواڵکەر نیم، ئەوە ئێوە هەر تێناگەن؟!
تۆزێک بێدەنگ بوو. ئەوجارە بە تۆنێکی تۆزەک هێمنتر گوتی: دەزانن چی؟
خەڵکەکە هەمووی بە بێدەنگی و واق وڕماوی لێیان دەڕوانی و وایان دەزانی کەسێکی ناتەواوە و نەخۆشی دەروونی هەیە.
پاشان هەرخۆی وەڵامی خۆی دایەوە: سیاسەت و بازرگانی بۆ ئەوان و تلیاکخۆری و سەرخۆشیش بۆ ئێمه.
ئیتر تێگەیشتن کە من شێت و نەخۆش و دەرۆزەکەر نیم، یان ئێوەش کێشەی تێگەیشتنتان هەیه؟
گوتم من تلیاکم دەوێت تلیاک. وای گوت و سەری خۆی بەرزکردەوە بۆ ئاسمان و تۆزەک لەو گەواڵە هەورە ڕاما، کە بەری تیشکی خۆرەکەی گرتبوو. دوای کەمێک، تا هێزی تێدابوو دایە قاقا. دووبارە سەیرێکی ئەو دوو ژنە بە تەمەنەی نزیکی خۆی کرد و پێی گوتن: گەمژەینە، دەزانن کە ئێوەش هەمووتان تلیاکخۆرن؟
بەڵام جیاوازی نێوان من و ئێوە تەنها ئەوەیە، کە من تلیاکخۆرێکی هۆشیارم و ئێوەیش مەست و بێ ئاگا!
