سێبەرەکەی ڕام.. کورتە چیڕۆک – ئیمان سامی
“٢٢ی دیسێمبەر” ڕام خۆشەویستەکەی لەدەستدا. تاکە شت کە بۆ ڕام’ی جێهێشت سێبەرەکەی بوو، ڕۆژێکی هێندە تاریک بوو هەوری ڕەش تەواوی شاری دا پۆشیبوو. هێندەی نەبرد ئەوەی لە ئاسمان بوو داباری، وەک بڵێی ئاسمان بیەوێت زەوی بۆ ئەبەد غەرق بکات.
ڕام ئەو کوڕە ١٩ساڵە بوو، لە مەملەکەتێک دەژیا دەیانزانی کە لە چ تەمەنێک کۆتایی بە ژیانیان دێت. نزای دەکرد تا ئاسمان ئارام بێتەوە و ئەگەر بۆ تەنها جارێکیش بێت خۆر دەرکەوێتەوەو بتوانێت لەگەڵ سێبەرەکەی بدوێت.
باران و بەفر وەک ئەوەی بیانەوێت خێرا بگەن بە دوایین مەنزڵگەیان بەخێرایی دادەبارین، دابارینێک کە یەکەمجار بوو مەملەکەتەکەی رام بەخۆیەوە بیبینێت، بەفر و باران و رەهێڵە وەک ئەوەی چەند ماددەیەکی کیمایی بن و ئاوێتە یەکتر ببن و هەڵبچن، بە درێژایی ٢١ رۆژ بە خوڕ دادەبارین بەجۆرێک تا ئاسمان چۆڕایەوە و دواین دڵۆپی باران و کڵۆی بەفر کەوتنە سەر شانی رام، ئیتر وردە وردە خۆر دەرکەوت.
ڕام لە هەناسەدان وەستابوو، دەیڕوانیە زەوی تا سێبەرەکەی دەرکەوێت، دوایی چەن خولەکێک لە وەستان سێبەرەکەی دەرکەوت. ڕام چاوەکانی بەتەواوی کرابوونەوە، ئەو کە هێشتا لە لە دیتنی سێبەرەکەی تێر نەببوو، چیبینی؟! بینی سێبەرەکەی خەریکە زیاتر و زیاتر لەخۆی دوور دەکەوێتە! سێبەرەکەی وەک ئەوەی پەرجوو بکات چەند وشەیەکی خزاندە گوێچکەی ڕامەوە ” دابەزە بۆ دۆڵی نەمران!”
ڕام بە ونبوونی سێبەرەکەی هیوای بە ڕۆژە پڕ خۆرەکانیش نەما و جەستەی کەشەنگی وەک بارستەی سەهۆڵین سارد ببوو، تەواو ئۆقرەی لێ بڕا بوو، هێندە بە قوڵی چوبۆوە ناخی خۆی خەریک بوو خۆی دەخواردەوە. بڕیاری دا دابەزێت بۆ دۆڵی نەمران بۆ گەیشتن بە مەعشوقەکەی. هەر لەگەڵ گەیشتنی بە کەناری دۆڵەکە سێبەرێک هات بەدەمیەوە. سێبەرەکە سێبەری نەمری جۆرجیۆس بوو! جۆرجیۆس رێبەرایەتی رامی دەکرد بۆ قوڵایی دۆڵەک، دۆڵەکە قوڵتربوو لەوەی ڕام دەیبینی، بەڵام بێ گوێدان بە هیچ مەترسییەک بەردەوام بوو لە رۆیشتن، رێڕەوێک کە ملیارەها ساڵی پێویست بوو بۆ ئەوەی چاو بیبڕێت. هەر لەسەرەتای ڕێڕەوەکەوە بەقەد دڵۆپی هەموو زەریاکان سێبەر لە ڕاست و چەپی ڕام وەک جوڵەی گرۆهی مێروولەکان دەجوڵان و وەک تارمایی لە ڕۆح و جەستەی ڕام نزیک دە بوونەوە. ئینجا جۆرجیۆس ئەو گۆچانەی کە بەدەستیەوە بوو دای بە ڕام و کشایەوە، کشایەوە، دەیزانی کە ئەوە دوا سنوری ئەوە!
ئیتر وەک ئەوەی هێزێک لە ناوەوە پێی بڵێت، گۆچانەکەی بە زەویدا چەقاند و عەرشی پیرۆزی پێتڕۆس دەرکەوت. دوازدە سێبەر دەرکەوتن و هەر یەکەیان ٤٠ کەزیان لە ملی رام ئاڵاند، بۆ ئەوەی بە نەمری بمێنێتەوە، لەگەڵ ئاڵاندنی هەر کەزییەک لە گەردەنی ڕامەوە، فیلیپۆس یاساکی نەمریی دەخوێندەوە، تا گەیشتە یاسای ٤٨٠ ئینجا بە دەنگێکی بەرزتر گوتی، “هەرکەس نەمر بێت مەرگی تەواوی ئازیزانی دەبینێت.” ڕام بە بیستنی ئەم یاسایە خەریک بوو جەستەی وەک لاولاوێک وشک ببێتەوە، دارەکەی لە زەویدا دەرهێنا و سێبەرەکەی بۆ هەتاهەتایە لە نێوان ژیان و مەرگدا هەڵواسرا و عەرشی پێترۆس وتەواوی دۆڵەکەش بوون بە تراویلکە!
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
