لە لێواری هەزار بە هەزارەکانا، بۆ ..ئاخر بۆ.. شیعری نەوزاد بەندی

من ئەمزانی عاجز ئەبی ،
بۆیە زۆر جار لەگەڵ تۆدا ،
تەنیاییشم بانگهێشت ئەکرد ..!
ئەی تۆ بۆچی زۆرجار ،
لەگەڵ مندا ،
زەنگێکیشت بۆ تەنیایی لێ نەئەدا ؟

٭ ٭ ٭

کاتێ کە تۆ پەیڤەکانت
ئەچپاند بە گوێما ، ئەمزانی
بە جێم دێڵی ..
بۆیە وەک پشیلەیەکی دەستەمۆ ،
تەنیاییم لەگەڵدا بوو ، ئەز ..
ئەی کاتێ من پەیڤەکانم
لە نوکی پارکەرەکەوە
بۆ ئەنوسیت ،
بۆچی نەتزانی جێت دێڵم ؟
بۆ تەنیاییت ،
وەک توتییەک لەگەڵ خۆتا نەئەهێنا ؟

٭ ٭ ٭

هیچ نەبێ ، کە ڕۆیشتی ،
ئەژنۆم نەشکا ..
بە کاوەخۆ هەستامە سەر پێ ..نەکەوتم ..
ئاگادار
لە دڕک و
ووردە شوشەکانی بەر پێ ..
هیچ نەبێ ، کە ڕۆیشتم ،
ئەژنۆت نەشکایه ..نە ..
بتتوانیایە بێیتە سەر پێ ..
بێ ئاگا نەبوویتایە ..نە ..
لە دڕک و
ووردە شوشەی
گڵاسە شکاوەکەی بەر پێ ..؟

٭ ٭ ٭

ئێستا ئیتر ،
چیدی بە کەس ناڵێم ،
وام لە پارک و پیاسە ئەکەم و
تەنیایی
وەختە تەواو توێکاریم کا ..
با توێکاریم کا ..قەیناکا ..
چیدی بە کەس ناڵێم ،
بۆ گەشتێکی دوورە وڵات ..
با خۆڵ و خاشاکی ئێرە ،
چۆنی بوێ
گەچکاریم کا ..
با خەم بێت و ، لە هەر چوار لا ،
دەسکاریم کا ..
زوڵم فێری زۆرداریم کا ..
با دڵم ڕەق بێ ،قەیناکا ..
ئیتر شیعر نەوێرێ توخنیشی کەوێ ..
فێری جەور و
تاوانباریم کا …قەیناکا

٭ ٭ ٭

بەڵام عەسرێ ،
لەپڕا تۆم بیر دێتەوە ..
بۆ وات نەکرد ،
عەسرێ له پڕ
منت بیربکەوێتەوە ؟

٭ ٭ ٭

ئەمووت : کە ڕۆیشت ،
با هیچ نەبێ تەنیاییم
لەگەڵ بێ تا دێمەوە ..
ئاخر بۆچی بە خۆت نەگووت :
کاتێ ئەو ڕۆی ،
با هیچ نەبێ تەنیایی ،
لەگەڵمدا بێ تا دێمەوە ؟

٭ ٭ ٭

کە ڕۆیشتی ،
نەک هەر چنگێ لە خۆتت
جێ نەهێشت بۆم
تەنانەت پارکەرەکەی
سەر مێزەکەت کۆکردەوە و
بردت لەگەڵ جانتاکەتا ..
وێنەی خۆت و جانتاکەتم له پڕ کێشا ..
کاتێ هەموو شتێکتان کۆ ئەکردەوە ،
بۆ ئەوەی من
بە تەواوەتیی بێ کەس بم ..
من هیچم کۆ نەکردەوە ،
کاتێ هەستام ،
لە دوورەوە خۆمم بینی ،
بێ بەرنامە ، دانیشتبوو ..

٭ ٭ ٭

ئێستا لە قەڵەباڵغییەکانا ،
خۆم ئەبینم و..
نایناسمەوە ..
خۆم ئەمبینێ و
نامناسێتەوە ..
گەڕاومەتەوە سەر خووەکانی مناڵیم ..
بە دوای حەکایەتێکا ئەگەڕێم ،
تۆم به دڵڕەق بۆ باس بکا ..
وەک ئۆتێللۆ ،
کە بە بێ هۆ ،
تاقە دێزدەموناکەی کوشت ..
بۆچی بە دوای حەکایەتێکا نەگەڕای ،
من بە دڵڕەق نیشان بدا ؟
وەک هاملێت ،
لەگەڵ دایکیدا ؟

٭ ٭ ٭

نا ..قەیناکا
ئیتر نامەوێ ،
لە شارێ،
کە هەموو ڕۆژێ بارانە ..
لە شەقامێ ،
کە 24 سەعات شەماڵ ..
بای دەریاکان به خۆڕایی دابەش ئەکا ..
نامەوێ
لە شارێکا بم ،
کەس نەناسم بێجگە له تۆ ..
کەس نەناسی بێجگە لە من ..
لە کافێیەکی پڕ لە خەڵک ،
کە دڵۆپەیەک جێگا نییە بۆ تەنیایی ،
نامەوێ بتبینم ..لەوێ ..
ئەی تۆ ،
بۆ بڕیارت نەدا ،
حەز نەکەی
بمبینی لەوێ ،
کە کەس نەتناسێ بێجگە من
کە کەس نەناسی بێجگە من ..
شەماڵ ،
به شەقامەکانا
بە خۆڕایی ، بای دەریاکان ساغ کاتەوە ..
کە لە کافێیەکی جەنجاڵا ،
کە تەنیایی بۆ خوێی چێشتیش
دەست نەکەوێ ،
هێشتا نەتەوێ بمبینی ؟
بۆ ؟
ئاخر بۆ …ئەو هەموو خەمەت بۆ من خوارد ؟
ئەو هەموو ڕۆژە
هەواڵێ ..
نامەیەکی سارد و سڕیشت
هەر نەنارد ..
بۆ ..
ئاخر ..بۆ …؟