خه‌ڵاتی شانازیی فێستیڤاڵی نێونه‌ته‌وه‌یی فیلمی “سلێمانی” به جه‌عفه‌ر په‌ناهی پێشکه‌ش کرا
جه‌عفه‌ر په‌ناهی: له وه‌رگرتنی خه‌ڵاتی شانازیی فێستیڤاڵی فیلمی “سلێمانی” زۆر خۆشحاڵم
مه‌نووچێهر جیهانی ـ خه‌ڵاتی شانازیی سێهه‌مین خولی فێستیڤاڵی نێونه‌ته‌وه‌یی فیلمی “سلێمانی” به جه‌عفه‌ر په‌ناهی ده‌رهێنه‌ری ناسراوی سینه‌مای ئێران و جیهان پێشکه‌ش کرا و له په‌یامێکدا گوتی: له وه‌رگرتنی خه‌ڵاتی شانازیی فێستیڤاڵی نێونه‌ته‌وه‌یی فیلمی سلێمانی زۆر خۆشحاڵم.
به پێی راپۆڕتی لێژنه‌ی راگه‌یاندنی سێهه‌مین خولی فێستیڤاڵی نێونه‌ته‌وه‌یی فیلمی “سلێمانی”، رێوڕه‌سمی کردنه‌وه‌ی سێهه‌مین خولی فێستیڤاڵی نێونه‌ته‌وه‌یی فیلمی “سلێمانی” که به ئاماده‌بوونی “مه‌لا به‌ختیار” به‌رپرسی به‌شی پشتیوانیی ئه‌م فێستیڤاڵه و له که‌سایه‌تییه‌کانی به‌رجه‌سته‌ی سیاسیی هه‌رێمی کوردستانی عێراق، “فوئاد جه‌لال” سه‌رۆکی کۆمپانیای سینه‌مایی “مه‌ستی فیلم” و به‌ڕێوه‌به‌ری فێستیڤاڵی نێونه‌ته‌وه‌یی فیلمی “سلێمانی”، “دانه‌ر عومه‌ر فارس” به‌ڕێوه‌به‌ری هونه‌ری، “بێهزاد فه‌راهانی” ئه‌کته‌ری ناوداری سینه‌ما، شانۆ و ته‌له‌ڤیزیۆنی ئێران، “مه‌حه‌مه‌دڕه‌زا ئه‌سڵانی” سه‌رۆکی ده‌سته‌ی ناوبژیوانانی به‌شی رکابه‌ریی فیلمه بڵینده‌کانی به‌ڵگه‌یی، “ره‌وانبه‌خش سادقی” ناوبژیوانی به‌شی رکابه‌ریی کورته فیلمه‌کانی ئه‌نیمه‌یشێن، ناوبژیوانانی به‌شه‌کانی جۆراوجۆری رکابه‌ریی فێستیڤاڵ، به‌ڕێوه‌به‌ری گشتیی فه‌رهه‌نگ و هونه‌ر و لاوانی پارێزگای سلێمانی، “ئازه‌ره‌خش فه‌راهانی” ئه‌کته‌ری سینه‌ما، ده‌رهێنه‌ره‌کانی وڵاتانی جۆراوجۆر و هۆگرانی هونه‌ری سینه‌ما، به پێشکه‌ش کردنی خاتوو “لینا ره‌زا” له ته‌لاری هونه‌ری شاری سلێمانی پایته‌ختی فه‌رهه‌نگ و هونه‌ری هه‌رێمی کوردستانی عێراق به‌ڕێوه‌چوو که خه‌ڵاتی شانازیی ئه‌م خوله‌ی فێستیڤاڵه‌که به “جه‌عفه‌ر په‌ناهی” سینه‌ماکاری ئێرانی پێشکه‌ش کرا و به نوێنه‌رایه‌تی له به‌ڕێزیان؛ خاتوو “تاهیره سه‌عیدی” هاسه‌ری ئه‌م ده‌رهێنه‌ره ناسراوه‌ی سینه‌مای ئێران و جیهان، “ئه‌مین جه‌عفه‌ری” به‌ڕێوه‌به‌ری فیلمهه‌ڵگرتنی فیلمی سینه‌مایی “سێ روخ” و “شادمێهر راستین” له هاوکاران و دۆستانی دێرینی به‌ڕێزیان، ئه‌م خه‌ڵاته‌یان وه‌رگرت.
سوپاس بۆ فێستیڤاڵی تازه‌دامه‌زراو به‌ڵام به‌هێزی فیلمی “سلێمانی”
“تاهیره سه‌عیدی” له دوای وه‌رگرتنی ئه‌م خه‌ڵاته، به ناوی “جه‌عفه‌ر په‌ناهی” له ده‌ستی “دانه‌ر عومه‌ر فارس” به‌ڕێوه‌به‌ری هونه‌ریی فێستیڤاڵی نێونه‌ته‌وه‌یی فیلمی “سلێمانی” گوتی” زۆر مه‌منوون له بانگێشته‌که‌تان و سوپاس بۆ فێستیڤاڵی نوێ و تازه‌دامه‌زراو به‌ڵام یه‌کجار به‌هێزی فیلمی “سلێمانی” و زۆر سپاسگوزارم که ئاغای په‌ناهی به شایسته‌ی ئه‌م خه‌ڵاته‌تان زانی. ئه‌و قسانه‌ی که بڕیار وابوو من بیڵێم، به‌ڕێز په‌ناهی له په‌یامی وێنه‌یی و ڤیدیۆییدا گوتیان.
په‌خشکردنی په‌یامی وێنه‌یی تایبه‌تی “جه‌عفه‌ر په‌ناهی”
به‌ر له پێشکه‌شکردنی خه‌ڵاتی شانازیی سێهه‌مین خولی فێستیڤاڵی نێونه‌ته‌وه‌یی فیلمی “سلێمانی” به “جه‌عفه‌ر په‌ناهی” له په‌یامێکی وێنه‌یی و ڤیدیۆیی تایبه‌تدا که له هۆڵی 1000 که‌سیی ته‌لاری هونه‌ر له شاری سلێمانی په‌خش و بڵاو کرایه‌وه، له ده‌ستپێکی قسه‌کانیدا به زمانی کوردی گوتی: “سڵاو و رێزم هه‌یه بۆ خه‌ڵکی سلێمانی” و له درێژه‌ی قسه‌کانیدا رایگه‌یاند: سڵاوم هه‌یه له خزمه‌ت هه‌موو هونه‌ردۆستان و سینه‌ما دۆستان له سلێمانی و به تایبه‌ت به‌رپرسانی به‌ڕێوه‌به‌ری فێستیڤاڵی نێونه‌ته‌وه‌یی فیلمی “سلێمانی” که منیان به شایسته‌ی وه‌رگرتنی وه‌ها خه‌ڵاتێک زانیوه.
له وه‌رگرتنی خه‌ڵاتی شانازیی فێستیڤاڵی نێونه‌ته‌وه‌یی فیلمی “سلێمانی” زۆر خۆشحاڵم
ده‌رهێنه‌ری فیلمی سینه‌مایی “سێ رۆخ” و براوه‌ی خه‌ڵاتی باشترین فیلمنامه‌ی به‌شی رکابه‌ریی سه‌ره‌کیی حه‌فتاویه‌که‌مین خولی فێستیڤاڵی نێونه‌ته‌وه‌یی فیلمی “کان”ی فه‌ڕه‌نسا، له درێژه‌ی قسه‌کانیدا گوتی: به راستی خۆشحاڵم و ئه‌مه به راشکاوی ده‌ڵێم؛ هه‌رچه‌نده له‌م فێستیڤاڵانه له‌م ناوچه‌یه‌دا هه‌بێت، ئه‌وه‌نده‌ش یاره‌مه‌تی بابه‌ت گه‌لی فه‌رهه‌نگی ده‌کات. ئه‌و ناوچه‌یه‌ی که هه‌رده‌م له مشتومڕی توندوتیژییه‌کاندا بووه.
په‌ناهی هه‌روه‌ها گوتی: ئه‌گه‌ر هه‌ر ئێستا من ئیزنم هه‌بووایه و ده‌متوانی له وڵاته‌که‌م بێمه
ده‌ره‌وه و چه‌ندین فێستیڤاڵ منیان بانگهێشت ده‌کرد، به دڵنیاییه‌وه بزانن که فێستیڤاڵی نێونه‌ته‌وه‌یی فیلمی “سلێمانی” له ریزبه‌ندی مندا ده‌بوو، هه‌ر به‌م هۆکارانه‌ی که گوتم.
ئێمه له رێگای سینه‌ماوه ده‌توانین کارگه‌لی گه‌وره ئه‌نجام بده‌ین
په‌ناهی رایگه‌یاند: ئێمه له رێگای سینه‌ماوه ده‌توانین کارگه‌لی گه‌وره ئه‌نجام بده‌ین؛ ئێمه ده‌توانین فه‌رهه‌نگسازی بکه‌ین، ئێمه ده‌توانین به مافه‌کان و ئازادییه‌کانمان بگه‌ین، ئێمه ده‌توانین بابه‌ت گه‌لی جۆراوجۆر چاره‌سه‌ر بکه‌ین و گه‌لانی جۆراجۆر له ته‌نیشت یه‌کتریدا، به ئاسووده‌یی و ئازادی پێکه‌وه بژین و رێز له مافه‌کانی یه‌کتری بگرن.
به داخه‌وه‌م که نه‌متوانی بۆ فێستیڤاڵی فیلمی “سلێمانی” بێم
“جه‌عفه‌ر په‌ناهی” له کۆتایی قسه‌کانیدا گوتی: به داخه‌وه‌م که وه‌ها نیه و به داخه‌وه‌م که نه‌متوانی بۆ فێستیڤاڵی فیلمی “سلێمانی” بێم؛ به‌ڵام هه‌ر چۆنێک بێت، خۆشحاڵم که هاوسه‌ره‌که‌م له‌وێیه و به نوێنه‌رایه‌تی له منه‌وه ئه‌م خه‌ڵاته وه‌رده‌گرێت و ده‌مه‌وێت تکا بکه‌م که به‌ڕێز “ئه‌مین جه‌عفه‌ری” به‌ڕێوه‌به‌ری وێنه‌گرتنی دوایین فیلمم “سێ رۆخ”، که له‌م به‌ر‌هه‌مه‌دا، یه‌کجار یارمه‌تی دام، هاوسه‌ره‌که‌م هاوڕێیه‌تی بکات و هه‌روه‌ها “شادمێهر راستین” که له زۆربه‌ی فیلمه‌کانمدا به جۆرێک راوێژکاری من و یار و یارمه‌تیده‌ری من بووه؛ ئه‌م خه‌ڵاته له لایه‌ن من وه‌ربگرن، بۆ ئه‌وه‌ی که خه‌ڵاتێک به شانازییه‌کانی سینه‌مای ئێران زیاد بێت. سوپاسی ئێوه ده‌که‌م و ئومێد ده‌خوازم له کاره‌که‌تاندا سه‌رکه‌وتوو بن.
مه‌نسوور جیهانی
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
