قەسیدەی عودی تەنهاییم بژەنە.. ستیڤان شەمزینی
لە هەیوانی ماندووبوونەوە
تەماشای لۆچی نێوچەوانی زەمەن ئەکەم
ئەو سروودە ئەچڕم:
بەلەمێک پێش نغرۆبوون بۆ مانگەشەوی ئەخوێند
بیر لەو هەموو ساڵە ئەکەمەوە
نەمتوانی دارەبەنی خۆشبەختی مارە بکەم
لە نێو حەسارەکانی شین و زاریدا،
شەبقەی تۆف و زریانم کردە سەر
لەو چرکە نەفرەتییە رائەمێنم
پەنچەرەکانی ترووسکەم لەخۆم کڵۆم دا
بوومە دەرگاوانی دۆزەخ
بە کڵپەی ئاگر غوسلی خۆمم لە ژیان دەرکرد
ئەو ساتە لە سینگما پەنگ ئەخواتەوە
بەرمۆدای نائومێدیی هەڵی لووشیم
لە کەناراوی زیندەبەچاڵکردنی ئازادیی و خۆشەویستیدا تفیمییەوە
دەستم خستۆتە ژێر چەناگەم،
ئەندێشەم لەسەر چڵی خەوزڕان نیشتۆتەوە
ئەو رۆمانە ئەنووسمەوە
وەک بزمار ئەچەقێت بە باوەڕە دەقگرتووەکانتا
خۆم و ئەسپە شێی بیرکردنەوە سەرکێشەکانم
چیاکانی کپی ئەبڕین
لە قوژبنی شەقامێکی چۆڵەوە هاواردەکەم
عەشق لەگەڵ منا کۆتایی دێ
ئەو پەیڤانە شی ئەکەمەوە
میتاڵی دڵی جەخار جەخاریان کردم بە ئاو
لەو هەستە مەلوول و پەنهانەدا لە دایک ئەبمەوە
تۆ هیچ کات دەرینابڕی
پەشیمانم لە درەنگ هەڵقوڕانی
ئەو پێکە شیرینەی عەشقی هەژاوت
لە پەڕینەوە بەسەر پردی خەونە بەهارییەکانتا
بەرەو هەسارەی چاوەکانت
لە خۆم دەپرسم بۆچی هیچ پەلەقاژەیەکم نەکرد
لەژێر چەقۆی تەنهایی
باوەشم نەکرد بەو زەمینەی تەنها تۆوی
ئەوینی تۆی تیا چێنرابوو؟
ئەمێستاش لەچاوبەستە ئەترسم
منی ماسی لە ئامێزی دەریا تۆراند
بووم بە تۆڕی مەراقەوە
لەحەژمەتی تەڕایی تۆدا بۆ هەمیشە خنکام
کە بارانی فرمێسکەکانت بەسەرما ئەبارین
من چەتری رۆحم هەڵکرد
تنۆکە ئەسرینەکانت لە رۆحما
بوونە غەمگینترین رووباری گریاو
ئەوەندە باسم کردوویت بۆ ئاسمان
ئەستێرەکان هەموو ئەتناسن
ئەوەندە پەسنی تۆم کردووە بۆ باخ
سەدان گوڵ سەری خۆیان هەڵگرت
ئەوەندە لێم روانیوی بە بێدەنگی و بێ دوان،
چاوم کەوتە قسەکردن
ئەوەندە خەیاڵم پێوە کردوویت
دڵم قەوزەی کردووە لە چاوەڕوانیتا
ئەوەندە پێکەنینەکانتم کردووە بە شیعر
فرمێسکەکانم دڵیان رەنجاوە
ئەوەندە نازی تۆم کرد بە سەمفۆنیا
مۆسیقاش سەری سووڕماوە!
بڕیارمداوە لە دێڕی هەموو شیعرێکما پێتبڵێم
تا لوتکە خۆشم ئەوێی
بڕیارمداوە لە هەر هەناسەیەکما
ئاهێکی سارد بۆ بیرکردنت هەڵمژم
بڕیارمداوە لەسەر هەموو رێگاکانی چاوەڕوانیم
هەمیشە تۆ ببینم
دەتۆش وەرە، بڵێ ئەمە خەیاڵ نییە
بەڵکو تەڕترین بەهاری ژیانتم
دەتۆش وەرە
تامی میوەی ماچ و رامووسانم بۆ بگەڕێنەوە
دەتۆش وەرە، لە لێڵترین شەوانما
لە ئاتەشگای بێکەسیما ئاگرێک بکەوە
دەتۆش وەرە
بە خاچی هاتنێکی ئەبەدییەوە هەڵمواسە
دەتۆش وەرە، بە سەرنجە سیحراوییەکەتەوە
دیواری شیعرم هەڵچنە
دەتۆش وەرە، لە زەمەنی کەڕبوونی ویژداندا
عودی تەنهاییم بژەنە
ئەوسا پێکەوە لە میحرابی ژووانێکا
نوێژێک بۆ عەشق ئەکەین و
دەست لە ناو دەست
بەسەر مەیتخانەی دابونەریتدا باز ئەدەین
لە کۆتایشدا
وەک دوو هەڵۆی بەرزەفڕی کوێستانان ئەفڕین
ئەبین بەدوو ئەستێرەی نوێی عاشق
لە فەسڵی خەزانی ئاسمانا
دە وەرە گیانی گیانم
تۆ تەنها کەرەمی هاتن بکە
