Skip to Content

شۆڕشی سپی لە هونەری شێوەکاریی ئەمڕۆدا … فەرهاد پیرباڵ

شۆڕشی سپی لە هونەری شێوەکاریی ئەمڕۆدا … فەرهاد پیرباڵ

Closed
by ته‌مموز 19, 2017 General

ڤایرۆس بوونی من لەناو زانکۆ و لەناو ناوەندەکانی هونەری شێوەکاریی ئەم ٢٥ ساڵەی دووایی کوردستاندا، دەگەڕێتەوە بۆ ئەوەی کە من چووم باکووری سیستەمی شێوەکاریی مۆدێرنم گۆشاگۆش سەربڕی؛
“دەیانگوت: منی ڤایرۆس، بەهای سەیر و سەمەرە و “نرخی زۆر بەرز”م دادەنایە سەر هونەر و تابلۆکانم – بۆ نموونە”!
Yes, I am..

هاوزەمانی پیشانگەی دووەمم بەناونیشانی (تووڕەبوونی کێ..)، کە بە زەکەری خۆم، واتە بە تەکنیکی لەناو ڕەنگ وەردانی زەکەرم، سیستەمی قۆڕی ئەوانم سەربڕی، یەعنی چووم سیستەمێکی جیهانبینیی “نەخۆش” و “شێت” و یاخیگەرانەی شەخسیی خۆمم بەسەریاندا کردە ئەمری واقیع. ئەمەش لەشێوەی شێوازێکی ورووژێن، قوتابخانەیەکی تایبەت.. شۆڕشی خەت!
توانیشم –بێگومان بەزەبری خودی بەرهەم و جەنگە هونەرییەکانم- ئەو تاکگەرایی و پێوەرە شەخسییانەی خۆم بۆ داهێنان، فەرز بکەمە سەر زانکۆ و خاوەنی پیشانگا و ناوەندە شێوەکاری و گەلەرییە حکوومەتییەکانیش. ئەمەش بۆ من سەرکەوتنێک بوو بەسەر ئەکادیمیەتی ئەوان و ڕێچکە گێل و وێل و بەیەکترچووەکانیان، ئەوانەی کۆکن لەسەر ئەوەی کە من یان ڤایرۆسم یانیش شێت.
من لەسۆنگەی نووسەربوونم، لەچاو شێوەکاران کە زۆربەیان ڕەنگدیت و فیگەربین دەژین، من زۆرتر پیتبین، لەناو حەڕفان ژیو، زیاتر حەڕفدۆست و خەتڕاکێش و حەڕفناسم. هێڵ و ژمارە و (شەخابیت) و خەت لەلام نێزیکتر و خۆشەویستتر و گرنگترن (ئاخر من کلک و لچک و گوێی ژمارەکانیش هەر دەبەمەوە سەر نووسین و خەت: هەم ژمارەکان و ڕەمزەکانی ماتماتیک، هەم خەت و هێڵسازی – شێوەکاری، بە هونەر و زانستێکی وەسەنی دەسەلمێنم).

بەم شێوەیە، بێ ئەوەی نەخشەم بۆی دانابێت من هێڵناس دەرچووم. زانیم بزانم چۆن بتوانم هەوڵبدەم سوود لە گەنجینەکانی ناو ئەشکەوت و مێترۆ و ئاودەسخانەکان وەربگرم، زانستەکانی لە قوتابخانە و لە خەڵک و زانکۆکان وەرمگرتبوون، هیچ و پێنەزان حسێب بکەم و هێزێک پەیدا بکەم بەهۆیان تا بکارم پێوەرەکانی خۆم و لەسەرحەقبوونی خۆم –هەم لە ژیانمدا و هەم ئی هونەرەکەم، فەرز بکەمە سەر جیهانی بچووکی ئەم ئەنعام و نەدیتکۆکانەی کە لە خیتاب و هاوارە ڕوون و ئاشکرا ئاشکرا ئاشکراکانیشم هەر تێ نەدەگەیشتن.
پێش ئەم شۆڕشی خەتەی من، هونەرمەندی فەرەنسی (ئەندرێ ماسۆن) نا، بەڵکو ئیسماعیل خەییات یەکەم شێوەکاری کوردستان بوو وایکرد سەرنجی من بۆ بایەخی هێڵ ڕابکێشێت و گرنگیی خەتم تێ بگەیەنێت لە نیگارکێشانی مۆدێرندا. من خەتم بە شێواز و تەکنیک و جەوهەرێکی تایبەت بە خۆم هێنایەوە مەیدان بۆئەوەی بەها و ئێستاتیکای خوداوەندانەی خەت بە خودی خەت ببەخشمەوە، ئنجا بتوانێت دەوری خۆی لە ڕەنگ بستێنێتەوە! بۆیە دەستم پێکرد بچم هێڵ و سیستەمی هێڵ و خاسیەتەکانی خەت سەرببڕم..
بەڵێ، من، لەسەر ڕێگای نێوان عەنکاوە – هەولێر، بەبەر چاوی خەڵکەوە، بەبەرچاوی هەموو مامۆستایان و هونەرمەندانی شێوەکارەوە، لەناوجەرگەی کۆلێژی هونەر جوانەکاندا، بەمەبەست و بەشێوەیەکی نەخشەبۆکێشراو چووم هێڵم سەربڕی؛ هێڵم سەربڕی و بە خوێنی ئەو بوو ئەو هەموو تابلۆیانەم..

هێڵ، پێش من، هیچ کەس نەیدەتوانی بێ ئیحتیرامی بەرامبەر بکات، زۆر زۆر ڕێزی لێ دەگیرا؛ ئوسووڵی ڕاکێشانی خۆی هەبوو، چەند شێوەیەکی باوی خۆی هەبوو، هونەرمەندانی تەنانەت گەنجیش ڕاهاتبوون دەچوون لاسایی شێوە ئاسایی و باوەکانیان دەکردەوە، یانیش زۆربەیان تەنیا وەک دیاریکردنی سنووری فیگەرەکان و ئاوت لاینەکان بەکاریاندەبرد، یان بۆ دەربڕینگەرایی و توانای ئەکادیمی بۆ سکێچ و پۆرترێت دروستکردن، بەکورتی: لای هەموو هونەرمەندەکان و لە هەموو قۆناغەکانی پێش خۆم، دەمدیت هێڵ، نەیتوانیبوو یاخی ببێت و بەتاقی تەنیا بتوانێت شتێک بێت، یان وەک من کردم ئەویش –هێڵ- خۆی بکاتە شێوازێک؛ بگاتە ئاستی ئەوی هونەرێکی عەنتیکە دروست بکات.
چۆن ڕەنگ بەتەنیا دەڕۆستی ئەوە هات تەجرید و ئەبستراکت و فۆڤیزم دابهێنێت، لەخۆمم پرسی: بۆچی هێلیش بەتەنیا نەتوانێت شۆڕشێک بەرپا ؟!
من هێڵم لەناو شێوەکاریی سەردەمی خۆمدا ڕوواند و ڕشاند و ڕەنگاند و ڕەنگیناند و ڕاوەشاند و ڕژاند و ژیاندەوە و ڕشاندەوەش.

فەرهاد پیرباڵ

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish