Skip to Content

135 Views

قەسیدەی (هەڵووەرین) … عبدالله احمد

قەسیدەی (هەڵووەرین) … عبدالله احمد

Be First!
by July 26, 2019 General, Poems
image_print

زەمەنێکه هەڵدەوەرم…!
بەسەر دار، دیوار
بەم خەراباتەدا هەڵدەزنم!
بۆ یادگاریەکانی منداڵیم دەگەڕێم!
وێڵ دەبم،
هیچیانم بۆ نادۆزرێنەوە!
چەندە غەمگینم “لێرە”
یەکێکیان سەر لـەو تەنیــــایی و ڕاکەڕاکی خەیاڵەم نادەن!
نە تۆ، نەنیشتیمان، نه ئارەزووە دێرینەکانم!
ھەناوم پڕیەتی له دەردە سەری زەمەنێکی دێرین و داڕوخاو، وێران وێران!
بەجێـــــماوم له ئاوێنەیەکی وردوخاش بوو،
له ئەستێرەی هەڵوەریوو،
له بێدەنگی ئێوارەیەکی نەهــــاتوو
هێشتا چاوەڕێی خۆر ئاوا بوونێک دەکەم!
ئەوە من بووم دەگریام!
ئەوە من بووم هاوارم دەکرد!
لەبەردەم دەرگایەکی ژەنگاوی که پیت بە پێت و وشەگەلێکی سەیر سەیرم لەسەر دەنوسینەوە!
ئەمئێستا ئەم پیت و وشانه بەیەکەوە نووساون…
که له دانیشگا و پەیمانگاکان دەخوێنرێنەوە،
وەلێ بۆیان لێكنادرێتەوە!
بۆنی ژەنگی دەرگاکە و هەڵوەرینی منیـــــان لێ دێت…!
کە سەیری ئێرە دەکەین، هەمووی گۆڕاوە.
کۆڵانەکان پڕبوون لە تەوژمی بــاوبۆران…!
پڕن له هەناسەیەی بۆن سارد
پڕن لە بۆنی باڵندەی مردوو…
کۆڵانەکانی ئێرە
زەمەنێکه خۆریان لێ ئاوا بووه
هەزاران ساڵه تاریکی باڵیان بەسەردا دەکێشێت…
ئیتر کۆڕستانێكە کۆڵانەکانی ئەم نیشتیمانەی لەباوەش گرتووه…!

تەماشاکە ئەی دۆست!
بەسەر خەراباتێکی کۆندا هـەڵــوەریووین،
گشت بەدەنمان بۆته تەپو تۆز و خۆڵ،
بیابانێکمان لەخەم،
لە بێکەسی،
له نەداری و ڕەنجەڕۆییدا دروستکردووه…!
ئەی دۆست،
ئەی ئەحبابی من؟
تۆ نازنی ئەز چەند بریندارم؟
هەموو ئاوازەکانی مردنم لەبەر کردووه،
وەک گەڵایەك که پایزان وەرینی خۆی لەیــادە…!
چەندین جار کەوتومەته بەر شاڵاوی مردن و
چەندین جار خوێنم بینیووە.
بینیم
لەژێر لولەی تفەنگ و زرمە و هۆڕی قۆنداغه تفەنگەکانی ئەو چاو ھەنگووینییە لووت درێژانەدا خوێن دەڕژا،
دەمبینی خوێن لەسەروگوێلاکی ئەو کیژە شۆخانه دەتکا
که بەشەڕەفی خۆیان سوێندان دەخوارد:
هەرگیز ماچ لەلێویان نەکراوە،
لەمسی خۆشەویستی نەڕژاوەته نێو سینەیانەوە،
گوێیان لەئاوازی پیاوە شەله یەك قاچەکان نەگرتووە!
قەت بە تەنورە و فانیلەیەکی قۆڵ کورتەوە نەسوڕاونەتەوە بەسەر سەرشەقامە پیس و پۆخڵەکانی ئەم شارەدا،
بۆ ئەبەد نەگریاون،
تەنها خەندەیەکی سەوز لە لێویان دەتکێ!
دەپرسم بۆ دەبێ وابێت؟
بۆ دەبێ خوێن و فرمێسك تێکەڵ بـه ویژدان، سۆزمان بێت؟
بۆ دەبێ غەم و پەژارە تێکەڵ بـە هـەناسە و ژیانمان بێت؟
تۆش ئەی جوانترین کچی نێو ئەم تاریکستانه،
لەشەوێکی وەها پڕ ڕەشەبـــا و تۆفاناویدا لە من هەڵھاتی؟
ئێمه دەمانویست
بەڕووناکی تاریکی ئومێدەوار بکەین.
بەنووکی پێنووسێکی شکاو حەقیقەت و عەشق بنوسینەوە.
دەمانویست مانگ و خۆر لەیەک باردا ڕابگرین
بەچەترێکی مـــۆرەوە لەژێر بارانێکی بەلێزمەدا سەمـــــای سۆفییانە بکەین
خۆشەویستی پەخش بکەین.
بەڵام ئەفسووس ئێمه کەوتینه بەر ڕەشەبــــــــا،
من لەژورێکی تاریك گۆشەگیر
تۆش لەبەر خۆرهەتاوی مانگی تەموزدا
چاوەڕێی گەڕانەوەیەکی بێ سنور بووی،
ئەمێستاکه سنوری ئێمه تەلبەندێکی بێشومارە لەدڕك،
بێشومارە لە تاڵی، ئازار و ناڵەی جودایی…
من ببینه!
ئێستاش بۆنی عشقم لێ دەتکێت،
من پاشماوەی جەنگێکی خوێناویم!
خوێناویتر له جەرگ و هەناوێکی بەنەشتەر تیخکراو!
خوێناویتر له ماسییەک که بەدەمی نەورەسێکی بێ ڕەحمەوە خۆی ڕادەپسکێنێت،
خوێناویترم له کراسی ژنێکی کوژراو
که ماچێك قەرزداری منداڵەکەی ناو سکی خۆی بوو!
ئیدی ئەم قەرزە بەهیچ فریشتە و ئەھریمەنێک نادرێتەوە!
من ئەو دڵۆپه خوێنـانەبووم که هەڵوەریم
لەجەستەی هەر ژنێکی کوژراوی
نێو ئەم نیشتیمانه چڵکن و تاریک و بۆره،
ئەی بۆرە نیشتیمان؟
ئەی چڵکترین کراسی خوێناوی؟
ئەی هەناسه ساردترین پیاوی نێو ئەم جەنگەڵه؟
ئەی خراپتر لەخۆم و پیستر لەتۆ؟
من کێم و تۆ کێیت و ئەو کێیــــــــە؟
نیشتیمان چیەوە و خاک چییە؟
ئەم هەموو نابوتگەراییه چیه و چۆن وەك عەڵقەیەکی زنجیر بەستراون بەیەکترەوە؟
ئیدی لە ئاسمانێکی دیکەوە
دەڕوانمه خۆر هەڵاتن و ئاوابوون!
لێره ئاسمانێکی ڕەش بەسەر
نیشتیمانێکی تەپ و تۆزاویدا دەڕوانێت!
هێزی ئەوەم نیه باڵندەکان
بگەڕێنمەوە ئاسمانی ئەم جەنگەڵه!
هێزی ئەوەم نەمـاوە تریفەی مانگ و
ئەستێر و گەلاوێژێکی چاو ڕەش
بگەڕێنمەوە بۆ ئاسمانی نیشتیمان،
لەشەوێکی وەهـا درێژ و خـــامۆش دا…!
زەمەنێکه خۆرم نەدیووە!
ئێستاش لە بیری ئاوابوونیدام!
دەزانی!
لەوساوە دڵگرانم که نیشتیمان
لەگۆشەیەکی تەنیایی خویدا منی گلاند؛
ئەوســـا هـەڵـوەریم!
ئەوســـا ژانی عەشق بەرۆکیگرتم!
ئەوســـا نـائومێدبووم
بەچەشنێك که نائومێدی بۆته عەڕشی ئەم ناوچەیه!
ئیتر ئێمە وەچەی پەژارەیەکین
که هێشتا لەبــــاوەش نەگیراوە…!

ــــــــــــــــــــــــــــ
(قەسیدەی هەڵوەرین)
نوسین: عبدالله احمد

21/7/2019

Previous
Next

Leave a Reply