شیعر/ نیشتمانی زیخ.. جەلال وەستا عەبدوڵا
…
ڕۆژگارێک
برای چەو و
پورزای لم بووم
نەنکم شەپۆل
باپیرەشم وردە بەردی کەناری چەم
خۆم زیخێکی چوارگۆشە بووم
بە زمانی ئاو ئەدوام
دەستم کورت و
سەرم دۆستی خۆرەتاو بوو
هاوڕێ
هاوشاری و
خزمیشم هاژەی ئاو بوون
بە ڕۆژ دەچوومە سەرپشتی گابەردێک و
یاریم بە پرچی خۆر دەکرد
شەویش تاریکیم دەپێوا و
هەتا باوێشک گازی دەگرت
پەنجەرەی مانگم دەژمارد
…
نیشتمانم قوڕی ڕەشی بێ خاوەن بوو
هەرکەس دەهات
شتێکی لێ درووست دەکرد
قوڕ وەک هەویر
یەکێک دەیکرد بە شەیتان و
یەکێکی کە بە حوشتری ماڵی حوسەین
لای چەپ دەکرد بە جنۆکە و
ڕاست بە ڕێوی ناو دۆڵ و شیو
…
ئێوارەیەک
شەپۆلێک هات پەلی گرتم
خستمییە ژێر سنگی پیری تاشەبەردێک
وونی کردم
لەوڕۆژەوە گوێم لە هەنگاوی
پێی هەورە و
چاوەڕێی ماچی بارانی گوندەکەمم
بیر لە ماسی دەکەمەوە و کانی کورە دەلاوێنم
بە خۆم دەڵێم:
ئاخۆ کەی بێت دەست بکەمە ملی لم و
تێر لەگەڵ چەو پێبکەنم
ئەوەی
لە قوڕ
دروستتیان کرد
بیڕووخێنم
