بەسەرکردنەوەیەکی کورت بۆ ڕۆمانی قسمەت.. شەماڵ بارەوانی

یەکەم دیمەنی ڕۆمانی”قسمەت” بەوە دەست پێدەکات
“هەندێک لەو کەسانەی لەو کافێیەی نزیک ئەو شوێنەی کە قسمەت خۆکوژ”انتحار”ی تێدا دەکات. دەیگێڕنەوە کە” شەو بوو. قسمەت بەخۆیی و منداڵێکی تەمەن دووساڵانەو دانەیەکیری شیرەخۆرەوە بەخێرایی بەرەو ئاڕاستەی ڕووبارەکە نزیک بوویەوەو نەعلەکانی و دوواتر ئەو ماکسیەکەی بەری داکەندن و سکەکەی کە دووگیانی پێوەدیاربوو وەدەرکەوت. منداڵە شیرە خۆرەکەو ئینجا ئەوەی دوو ساڵانە و پاشان خۆیشی خستە ناو ڕووبارەکەوە”.
قسمەت
کەنووسەر ڕۆمانەکەی بەناوی ئەمەوە ناوناوەو لەسەرەتای چیرۆکی ڕۆمانەکە تا کۆتایی ئامادەگی و ناو وجودی دەبێت،
ئەو ژنێکی کوردی فەیلیە. بەو چەشنە شەوێک بڕیار دەدات کۆتایی بەژیانی خۆی بنێت ، بڕیارە مەترسیناک و هەڵەکەی دەکاتە کردار و کچەکەتەمەن دووساڵ و منداڵە شیرەخۆرەکەیشی لەسەر پردی دیجلە داوێتە ناو ڕووباری دیجلەو دواتر خۆیشی دەهاوێژێتە ناو ئاوەکەوە،

ڕۆمانی “قسمەت”. ڕۆمانێکی تری ژنە نووسەری عێراقی”حەورا ئەلنیداوی”ە، یەکەم چاپی لەساڵی٢٠١٨ لێ بڵاو بووەوە.نووسەر ڕۆمانەکەی بەسەر سێ بەش دابەشکردووەو چیروکی ژیانی ژیانی خانەوادەیەکی کوردی فەیلی تێدا باس دەکات و لە مێژووی ژیانی عێراق دەدوێت لەساڵی١٩٥٠،تاوەکو٢٠٠٩.
ئەو خانەوادە کوردە فەیلیە، کە لەساڵی١٨٧٣ لە هەرێمی لۆرستان لەترسی والی ڕایانکردووەو له بەغدا گیرساونەتەوە. پێشەوەی ڕەزا شای پەهلەوی بێت و ئەو هەرێمە بخاتە ژێر حوکمڕانی خۆی وبیخانە سەر ئێران و هەوڵی سڕینەوەی ناسنامە نەتەوییە کوردیەکەی و سیمای کوردبوونی هەرێمەکە بدات و بە پارسی و ئێرانی بوونی بکات.

خوێنەر لە کاتی خوێندنەوەی ئەو ڕۆمانە، ئازار و موعاناتی کوردە فەیلیەکانی دەبینێت، کە چ شێوازێکی هۆڤانەو نامرۆڤانە لەلایان بەعسیزمەوە ڕوو بەڕووی چەوسانەوەو ئیبادەو ڕەشبگیری و مەرگ و دەربەری دەبنەوە.
کوردە فەیلیەکان لە سەردەمی بەعسیەکان و لەلایان ئەحمەد حەسەن بەکرو دواتر سەدامی گۆڕ بەگۆڕ توشی چەوسانەوەو ڕاوەدوونانێکی زۆر هەمەجیانەو کوشتن و عیدام کردن و دەرکرد بوون، لەساڵی١٩٧٠ ئەو کاتەی بەعیسەکان حوکمڕانی وڵاتیان دەکرد، تاوەکو ٢٠٠٣و کاتی ڕوخانیان، دەیان هەڵمەتی پاکتاوی و چەوسانەوەو لەناو بردنی کوردانی فەیلیان ئەنجامداو ناچاریان کردن وڵات جێ بێڵن و بەزۆری و لەژێر فشار و تیرۆر و تۆقاندندا . له زێدی ڕەسەنی باو باپیرانیان دووریان دەخستنەوەو حزبی بەعس بڕیاری بێ بەشکردنی کوردە فەیلیەکانی لەناسنامەی عێراقی بوون دەرکرد و بە ئیێرانی هەژماری کردن و بە شێوەیەکی بەرنامە داڕێژراوانەو هۆڤانە کەوتە کوشتن و عیدام کردنی کوردە فەیلیەکان،
لەشارەکانی بەغداو خانەقین لە١٩٧٩ دوای ئەو دوو شارە ، ئەو ڕەشبگیری و هەڵمەتە بەربەرییەی گواستەوە بۆ شارەکانی تریش و لە دەرەنجامی ئەو کارە وەحشیگەرانەی بەعسیە فاشییەکاندا ٣٥٠کوردی فەیلی ئاوارەی ئێران بوون و زیاتر لە پانزە هەزاریشیان ون و بێ سەرو شوێن بوون و حزبی بەعسی عەرەبی کۆکوژو ئیبادەی کردن و تەنانەت تا ئێستا تەرمەکانیشان نەدۆزراوەتەوە.”ساڵی ١٩٨٠زۆرترین ڕاوەدوونان و دەرکردن تێیدا ڕوویدا، ئەو ڕاوادوونانەی لەساڵی١٩٧٥، لەسەردەمی سەرۆکی ئەوساتە”ئەحمەد حەسەن بەکر”دەستی پێکرد…دواتر سەتان خانەوادەی عێراقی کۆکرانەوەو دەکران و نێردرانە سنووری ئێرانەوە بە بیانووی تەبعیەت و لایانگری ئێران… بەڵام من نەم دەتوانی لەوە تێبگەم بۆچی ئێمە ئێرانین خۆ ئێمە پێش هەموو شتێک کوردین، ئەگەر هاوڵاتی عێراقیش نەبین سەرەڕای ئەوەی هەموو ژیانی خۆمان وا بەڕێکرد بەڵام بەڵگە چییە لەسەر ئێرانی بوونی ئێمە ئەو ئێرانەی هەرگیز پێشەوەی لەڕۆژێکی ساردو سڕی بەفراوی زستاندا بمانترەنجێننە سنورەکانی و بە خۆخشکەبمان خزێننە ناوییەوە نەمان بینی بوو”.

بەو چەشنەی کوردەکان ڕووبەڕووی هەڵمەتی کوشتن و ڕاوەدوونان و زەوتکردنی ناسنامەدەبنەوە.
لەوڵاتێک لەوەتەی درووست بوونییەوە کورد دەچەوسێنێتەوەو هەوڵی سڕینەوەی کورد بوونی دەدات و کورد بوون وەک تاوانێک سەیری دەکات و بەردەوام گەورەو بچوک و جەوان و دان عەمرو ژن پیاو منداڵ و تاکی کورد دەکات بە سوتەمەنی و قوربانی ئەژدەهای بیری عروبەی شۆڤێنی و ڕەگەز پەرست و لەسەر نیشتمانی ڕەسەنی خۆت. داگیرکەرانی و مێژوو و خاک و کلتورت. دەرت دەکەن و دەتکەن بە پەناهەندەو سەرگەردان و پەرش و بڵاوی دنیات دەکەن و وەک ئاژەڵێک دەت ئاخنە ناو پاشەوەی ئۆتۆمبیل و ڕادەستی چارەنوسێکی نادیارو دێوەزمەیەکی دڵ ڕەق و سنوورێکی مین ڕێژکراو بە بۆمب و مەرگت دەکەت و بە غەریبی و نامۆییت دەسپێرن “لەو شوێنەی کە یەکەم وێستگەی ڕاگواستن و دەرکردن و کۆچکردن مان بوو،ئەفسەرو سەربازە دڵ ڕەقەکانی ڕژێمی بەعس کۆیان کردینەوەو دەیان بێ ڕێزی و جوێنی ڕەگەز پەرستانەیان ئاڕاستەکردین و هەندێک لەخانەوادەکان به جڵی نووستنەوە هێنرابوون بۆ ئەو شوێنەو کچێک بەجڵی خەوتنەوەبوو، جڵێکی نیمچە ڕووت و هەموو ئەعزای بەدەنی بەدەرەوەبوو… یەکێک لەژنەکان سەرپۆشەکەی خۆی وێ دا تاوەکو جەستەکەی خۆی داپۆشێت و لەسەرنجەکان بەدووری بگرێت. لەوانەیە ئەوە دووایین شێوازی پۆشینی ئەو شێوازەی جڵ و بەرگ بێت بەو شێوازە ورووژێنەرو و پاژنەی پێڵاوەکانی بەرزبێت ئیتر دوای ئەوەی دەگەین بە ئێران. لەوێ بەشێوەیەکی ڕەهاو بەپێی یاسای مەزەبی لەچک و باڵا پۆشی بەسەر ژن و کچەکاندا دەسەپێندرێت…لەسای یاسای باڵاپۆشی زۆرداری و ناچارکردنی ژن و کچەکان . لە ئێران ژن و کچەکان بوێری ئەوەیان نەدەکرد بەشێکی قژیشیان دەرخەن وەک دوایی دەبینن چۆن ژنەکان جاڕی یاخی بوون و پێ گیری نەکردن دەدەن لەدژی ئەو حوکم و یاسایەی بەزۆر سەپاندنی باڵاپۆشی و لەچکی کۆماری ئیسلامی ئێران…

بەو شێوەیە دەستیان کرد بە دەرهێنانی یەکە یەکە لەخانەوادەکانمان و پاشان فەرمانیان کردین سواری پاشەوەی پیکابەکان بین. کە پێشووتر بۆمان ئامادەکرابوون…لەگەڵ کۆتایی کاژێرەکانی بەیانی گەیشتینە ئەو خاڵەی ئەوان دەیان وییست.ئەفسەرەکانی ئەمن و ڕژێمی بەعس دابەزین…ڕووی چەکەکانیان ئاڕاستەکردین… یەکێک لە ئەفسەرەکان گوڕاندی و بەدەست ئاماژەی کرد:
ئەو چیایە لەوێ دەبینن، بڕۆن تێی بپەڕێنن و لەو دیوی دەگەن بە خومەینی و ئەو چاوەڕێتانە…ئێمەیان لەسەر سنوور بە بێ حاڵ و ماڵی و سەرگەردانی لەناو کەڵبەی موشەک و مین و برسیەتی و ساردی جێ هێشت…
هەزاران مرۆڤی بەتەمەن و ژن و منداڵ لەو کۆچ و دەرکردنەدا. زۆربەی لەڕێگە بوونە قوربانی بێ ئەوەی تاوانێکیان ئەنجام دابێ، تەنها ئەو ڕێکەوتە بایۆلۆجیە نەفرەتیە نەبێ کە لەدەرەنجامی دا بەکوردی فەیلی لەدایک بوون”.
ئەو ڕێژێمە دڕندە شۆڤێنیەی بەعس تەڕ و وشک یپێکەوە دەسوتان و ڕەش و سپی پارێزراو نەبوون لەدەست دەسەڵاتە دڕندەییەکەی و هەر کەسێک بە پێی ئایدۆلۆجیا عروبە ڕەگەزپەرستیەکەی بەعسیزم نەجوڵابایەوەو بەعسیەتی نەکردبا بە ڕێباز و ئەقیدە،هەمان چارەنووسی کوردی دەبوو و مردن و دەرکردن و تراژیدیا چاوەڕێی دەکرد” دەرکراوان هەموو کوردانی فەیلی نەبوون. تەنانەت زۆربەی بە بنەچە ئێرانیش نەبوون وەک ئەوەی حکومەتی عێراقی بانگەشەی دەکرد و زۆرێکیان خانەوادەی بە بنەچە عەرەبی بوون و ڕژێمی بەعس دەیویست بەهەر هۆکارێک لە هۆکارەکان لێیان ڕزگاری بێت”.
ئەرێ بۆچی دەبێ لەسەر بیرو باوەڕو ناسنامەی کورد بوونت ڕووبەڕووی جینۆسایدو تەرحیل و ڕاگواستن و کوشتن ببیتەوە؟
بۆچی دەبێ بەو شێوە دڕندەییە کورد لەناسنامەی هاوڵاتی بوونی بێبەشکرێت و نەتەوەیتر خۆی لێ بکات بەسەردار و کوردی تەنها وەک پاشکۆو خزمەتکارو سێبەرو جاشی فیکرەی عروبەو عەرەبە شۆڤێییەکان قبوڵ بێت و هەر کوردێک بڵێ نەخێر من کوردم و کولتور مێژوو و فەرهەنگ و هەموو شتێکم لەهی عەرەب جیاوازەو ئەو کاتەی من لەسەر ئەو خاکە دەژیام و خاوەن خاک وماڵ بووم کە پێی دەڵێن عێراق ، حوشترێکی عەرەبیش لێ نەبوو و ئێرە هەزاران ساڵە کوردی لێ دەژیت و ماڵی کوردەو عەرەب بەشێوەی شەڕو داگیرکاری و کۆچەری و لێقەوماوی و چەندین شێوەو سیاسەتی ترەوە هاتوون و ئەوڕۆ خۆیان کردووە بە خاوەن ماڵ و کوردیش بە میوانێکی ڕەزاگران یا خود بێگانەیەکی نەخوازرا!!”بۆچی دەبێ کەسیکیتر بڕیار لەبارەی شێوەو ڕووی نیشتمانم بدات؟ چۆن ئەو دەسەڵاتەی بۆ پەیدا بوو من لە نیشتمانەکەی دابڕنێت…کاتێک منیان لەڕەگی خۆم دەرەهێناو فڕێی کەناری غوربەتیان دام و لەناسنامەو تەمەنی خۆمیان داچۆڕاندم، کفرم کرد بە هەموو مێژووەکەیان،سنوورەکەیان، ئنتیماو شانازییە پڕو پۆچەکانیان ، ئەو دیکتاتۆرە دڵڕەقانە ئێمەیان بەتەواوی فەرامۆش کرد. لەڕاستی دا من خودی نیشتمانم کە لەسەر دوو پێیەکانی دەڕوات”.

بەوچشنە کورد لەناو ئەو وڵاتەی پێی دەڵێن عێراق جگە لە دەرکرن وزەوتکردنی ماف و لێسەندنەوەی ناسنامەو ماڵوێرانی و ئەنفال و هۆڵۆکست هیچیتری نەبینیوەو
دواجارو لەساڵی ٢٠١١لە پەڕلەمانی ئەو وڵاتەی تائێستاش دەمان چەسێنێتەوەو ماف و کەرامەت و خاکمان پێشێل دەکات، دان بەوەداندرا کە لەسایەی ئەو عێراق و سەدام و بەعسی عەرەبی شۆڤێنییەوە لەساڵی١٩٨٠دا کوردانی فەیلی لەلایان حزبی بەعسەوە ڕووبەڕووی پاکتاوی ڕەگەزی و کۆمەڵکوژی بوونەتەوەو کۆکوژکراوان.

ڕۆمانی قسمەت، چیرۆکێکی ئەفسانەیی یاخود حەکایەتێکی خەیاڵی وفەنتەزی نییە و نووسەر لەخەیاڵی خۆیەوە دایڕشتبێت و هۆنیبێتەوە، ڕاستە هەموو داستان و ڕۆمان و چیڕۆکێک هەرچەند واقعی بێت و حەقیقەتێکی بۆ هەبێت، بێ گومان نووسەر خەیاڵ ئاوێتەی چیرۆک و گێڕانەوەکان دەکات، نووسەری”قسمەت”یش بەتێکەڵکردنی فەنتاز بەمەبەستی تەشویق و زیاتر ڕازانەوەو ڕەونەقدارکردنی گێڕانەوەکەو بەتام کردنی چیرۆک و ڕووداوەکان ئەو شێوازی ئاوێتەکردن و تێکەهەڵکێشکردنی فانتازیاو واقع. هەرئەو تایبەت مەندی و شێوازەیشە کە نووسینێکی ئەدەبی لەگێڕانەوەیەکی مێژوویی وشک و ڕووت و بێ گیان جیا دەکاتەوە.

خاتوونە نووسەر ئەوەی باسی دەکات مێژوو و ڕووداو چیڕۆکی ڕاستەقینەی ژیانی هەموو کوردانی فەیلیە،کە بەدەست ڕژێمی بەعس و سەدامی دیکتاتۆر، دەیان تاڵی و ناسۆری و دەربەری و چەوسانەوەو تراژدیایان چەشتووە،
نووسەر لە گێڕانەوەی چیڕۆکی ڕۆمانەکەیی و لە داڕشتن و گێڕانەوەی ڕووداوەکان پشتی بە ڕووداوەکانی مێژوو و ئەو نووسین و بابەتانەوە بەستووە کە لەسەر ئەو تراژدیاو چەوسانەو دەرکردن و کۆکوژییەی کوردە فەیلیەکان نووسراون و لە پەرتۆک و گۆڤار و ڕۆژنامەو سایتە ئەلیکترۆنیەکان بڵاو کراونەتەوەو بۆ ئەو مەبەستەیش سەردانی گەڵێ شوێنی کردووە تازانیاری زێدەتر لەو بارەیەوە کۆبکاتەوەو لە ڕۆمانەکەی پشتیان پێ ببەستێت و بابەتەکەی پشت ئەستوورترو دەوڵەمەندتر بکات و دووای ماندووبوون و هەوڵ و شەو نخوونی و گەڕانێکی زۆر. لەکۆتاییدا ئەو کارە ئەدەبییە ناوازەیەو ئەو داهێنانە مەزنەی خۆیمان لەدوو توێی شاکارێکی ئەدەبی و لەژێر ناونیشانی” قسمەت”وە پێشکێش بکات و خەرمانەیەکی تری ئەدەبی جیاواز بخاتە سەر کتێبخانەی مرۆڤایەتی و بۆ دنیای نووسین و ڕۆشنبیری بسەلمێنێت کە ئەو وەک ژنێک هیچی لە پیاو کەمتر نییەو خاوەنی بەهرەیەکی بەرزی نووسین و داهێنانی ئەدەبییەو شایەنە پێی گوترێت ژنە داهێنەرو نووسەر و پێنووسە بەویژدان و سەرکەوتوو و لێهاتووەکە.

چیرۆکی ڕۆمانەکە باسکردنە لەخانەوادەیەکی کوردی فەیلی، نووسەر لەڕێگەی چیرۆکی ئەو خانەوادە کوردە فەیلیە باس لە کۆچکردن و کێشەی ناسنامەو هەموو ئەو ئازارو نەهامەتیانە دەکات کە کوردانی فەیلی ڕوو بەڕووی دەبنەوە.

قسمەت
چیرۆکی چارەنووس و دەربەدەری و تراژیدیاکانی کوردانی فەیلیە.
داستانی تراژیدیای نەتەوەیەکە”کوردانی فەیلی”لەسەر دەستی عەرەبە ڕەگەز پەرست و شۆڤینییەکان تووشی پاکتاوی ڕەگەزی و سڕینەوەی ناسنامەدەبن.

قسمەت.
تراژیدی نامەیە، ڕۆمانێکی ئەنترۆپۆلۆجیە،
نووسەر بەوردی باس لە نەهامەتی و ئازارو ناڵەو ڕاوەدوونان و کۆمەڵکوژکردن و کۆچکردن و
ناسنامەو ژیانی ڕۆژانەو زمان و یادگەی چیایی و بنەچەو کولتورە کوردەوارییە ڕەسەنەکەی کوردانی فەیلی دەکات .

خانەوادەی “مەلا غولام عەلی ڕەحیم”کوردی فەیلی شیعە مەزەبە لەماڵێکدا دەژین لە گەڕەکی”الدهانة”. لە بەغدای پایتەخت، پێشووتر ماڵە جوێک پێش کۆچکردنیان لە کۆتایی چلەکانی سەدەی ڕابردوو بۆ وڵاتی ئیسرائیل تێیدا نیشتەجێ بوونە،
ئەو گەڕەکەی پێشەوەی عەرەبی هاوردە ڕووی لێ بکەن و تێیدا ئاکنجی بن، لەکۆنەوە زۆربەی دانیشتوانەکەی جوو کریستیان بوون.
چیرۆکی چارەنووسی خانەوادەی مەلا زۆر لە چیرۆکی چارەنووسی ئەو خانەوادە جووە دەکات کە پێشووتر لەو خانووەدا ژیاون. ئەو خانەوادە فەیلیە کوردە هەمان شێوەی سەتان و هەزاران خانەوادەی تری کوردی فەیلی لەلایان حزبی بەعسی دیکتاتۆر و فاشیست دەچەوسێندرێنەوەو ناسنامەیان لێ دەسەندرێتەوەو دەربەدەرو ئاوارە دەکرێن، بە پاساوی لایانگریان بۆ ئێران، ئەوە چارەنووسی کورد بووە بە درێژایی مێژووی درووست بوونی ئەو دەوڵەتەی پێی دەلێن عێراق، هەموو سەرۆک و ڕژێمە یەک لەدوای یەکەکانی لە یەکەم پاشاوە، تا ئێستاکێ هەچی لەدەستیان هاتبێ و بۆیان چووبێتە سەرو گونجاو بووبێ درێخی و کەم تەرخەمیان نەکردووە لە داگیرکردنی خاکی کورد وسڕینەوەی ناسنامەکەیی و دەست بەسەرداگردتنی ئازادی و مافەکانی و شێواندنی زمان و کەلتور و مێژووەکەی و ئەنجام دانی تاوانی جینۆسایدو کۆکوژی و کیمیاباران و ئەنفال و خاپوورکردنی هەزاران دێهات و بۆردوومانکردنی شارەکانی و دەربەدەرکردنی کورد. هەکامیان هاتبێتە سەرحوکم و جڵەوی حوکمڕانی گرتبێتە دەست و بۆی لوابێ، سەلماندوویەتی کە سەدامێکی تەمام عەیارە لەفاشییەت و ڕەگەز پەرستی و پێڕەوکردن لەسیاسەتی پاکتاوکردن و تەعریب کردن و کوشتن و سڕینەوەی کورد،شیعە و سونە، ڕاست و چەپ و نەتەوەگەراو ئیسلام گەرا و لائیک و عیلمانی و -مەزەبی و عەدەمی، کۆماری و پاشایەتی، هەموویان لەبەرامبەر کورددا یەک ئەقڵیەت و کۆمەڵێک دەم و چاوی جۆراو جۆر و سیاسەت نەگۆڕن.

ئەو وڵاتەی لەوەتەی لەدایک بووەو هاتوەتە بوون هەر دەڵێی زەویەکەی بە نەفرینی ئاسمان کەوتووەو ئەهریمەنی شەڕانگێزی بەڵێنی داوە کە هەرگیز دەرفەت نەدات ئاشتی و ئاساییش بەخۆیەوە ببینێت و لەچنگ کەڵبەی دێوەزمەی جەنگی مەزەبی و تائیفی و گروپە ڕەگەز پەرست توندڕۆ و میلیشیاکان و کێشەی تیرۆر و کوشتن و بێ دادی و گەندەڵی و قەیران قورتاری نەبێت و تارمایی تاریکی و فەوزاو و کێشەو ناکۆکییەکان یەخەی ئاسمانەکەی بەرنەدەن و ژیان تێیدا هەموو دەم بە تونێڵێکی ڕەش و تاریک و تابڵۆیەکی خوێناوی داپۆشرابێت.
خانەوادەکەی مەلا غولام جارێک لەسەر مەزەبی بوون و هەزار جار لەپێناو کوردبوونەکەیان.ڕووبەڕووی ئەو هەموو تراژدیدیاو کارەساتە دەبنەوە، ڕاستەغولام کوردێکی مەزەو شیعەیە وەلێ ئەو زۆر پابەندی و مەزەب و ئاییندارییەوە نییە” ئەو لەگەڵ ئەوەی زۆر ئاییندار نەبوو و هێندێک جار نوێژی دەکرد وهەندێک جاریش نەیدەکرد…بەڵام ئەو پێشەواکانی خۆش دەویست و بڕوای وابوو کە زەوی عێراق پیرۆزە بۆخۆی و نەوەکانی چونکوو ئەولیاکانی خوای تێدا نێژراوە، ئەو هەرکاتێک هەستی بە ناڕەحەتی بکردبا سەردانی نەجەف یاخود کەربەلای دەکرد بۆ سەردانی کردنی ئەو کەسانەی کە ئەو بڕوای وابوو ئەوان واسیتەکار و نێوانکاری نێوان ئەم و خوان، تەنانەت سووربوو لەسەر سەردانی کردنی موسای کازم کاتێک دەرفەتی بۆ بگونجابوایە”

خانەوادەی مەلا غولام عەلی.
دوای دەرکردن و کۆچکردنیان لەنێوان سنووری عێراق-ئێراندا دەگیرسێنەوە، مەلا غولام بو یەکەم جار هەستکرد بە نامۆیی دایدەگرێت و هەستی ئەوەی لا درووست دەبێت، کە ئەو بێگانەو خەڵکی سەر ئەو هاسەرەیە نییە، عێراقی فەوزاو تیرۆر و چەوسانەوەو فاشییەت دەریان دەکەن و ناسنامەیان لێ دەسەننەوە بە پاساوی لایانگریان بۆ ئێران، ئێرانی کۆماری پەتی سێدارەو کوردکوژی و مەزەبی و مەلالی ئاخوندەکانیش ڕەتی دەکەنەوە لەخۆیان بگرن و ڕەگەزنامە بەخۆی و خانەوادەکەی ببەخشن بە بیانووی عێراقی بوون و ئێرانی نەبوونیان.

چەند دێڕێک لەبارەی نووسەرەوە.
حەوراءئەلنەداوی نووسەرو ڕۆماننوسێکی بەڕەگەز عێراقیەو لەوڵاتی دانیمارک پێگەیشتتوەو ئێستا لە لەندەنی پایتەختی بەریتانیا دەژیت، لە ئۆگۆستسی ساڵی١٩٨٤لە بەغدا لە دایک بووەو ژیانی هاوسەرگیری لەگەڵ “نەشئەت ئەکرەم”ی یاریزانی عێراقی پێکهێناوە.
لەپاڵ ڕۆمانی قسمەت،نووسەر خاوەنی ڕۆمانی”تحت سماء كوبنهاغن”ە.کەیەکەم چاپی لە ساڵی٢٠١٠لێ دەرچوو.

……شەماڵ بارەوانی