Skip to Content

101 Views

لە زمانی خۆیانەوە، سەرمایەداری بە کەڵک نایات! …عبدالرحمن محمد (مەلا رحمن ئاوارەکان)

لە زمانی خۆیانەوە، سەرمایەداری بە کەڵک نایات! …عبدالرحمن محمد (مەلا رحمن ئاوارەکان)

Closed
by July 21, 2020 General


مەسەلێک هەیە دەڵێت:( قونی ڕەش و سپی لە بواردا دەردەکەوێت)، لە مانگی ئازارەوە، بەشەریەت توشی پەتایەکی سەرتاسەری کوشندە بووەتەوە، کە نە سنوور و نە ناسنامە و نە ڕەگەز دەناسێت لە ژێر ناوی کۆرۆنا یا کۆڤید ١٩، ئەم پەتایە دەیان و سەدان شێکاری بۆ کراوە، لە دیاریکردنی سەرچاوەکەیەوە تا دەگاتە شێوەکانی و هەروەها دیاریکردنی ڤاکسینێک کە بتوانرێت ڕێگەی پی بگیرێت
دیارە لە ڕووی سیاسی و ئابووری و کۆمەڵایەتیشەووە ئەم ڤایرۆسە ڕۆڵ و نەخشی دیارە، و شێوەیەک لە جیاکردنەوە و تایبەتمەندی کۆمەڵگا و وڵاتە جیاوازەکانی خستەڕوو. ژێرخانی کۆمەڵگاکان لە چەندایەتی و چۆنایەتی خستەڕوو، لە ڕووی گەندەڵی دەسەڵات و دەستپاکی سیستەمی فەرمانڕەوا خستەڕوو، لە ڕووی فەرهەنگیەو ئایدۆلۆجیای ڕەسمی پەیڕەوکراو لە دەوڵەتدا، ڕێژەی تووشبوان و مردووەکان نیشاندەری تۆکمەیی و بێ دەربەستی دەسەڵاتی مەوجودە لە کۆمەڵگادا.
لە ژێر فشاری ئەم ڤایرۆسەدا، سەرانی سەرمایەداری خۆیان و بە زمانی خۆیان و لە میدیاکانی خۆیانەوە ئیعترافاتەکانیان بەرامبەر بێ دەربەستیان و نائامادەکاریان بۆ ڕووبەڕووبونەوەی کارەساتێکی لە ناکاوی وەک ئەم ڤایرۆسە لە ئاستی خوازراودا نەبووە!؟ دەبوایە زیاتر و زیاترتر، ئامادەبوونایە!؟
ئەنتۆنیۆ گۆتریش، ئەمینداری گشتی نەتەوە یەکگرتوەکان دەڵێت: کۆرۆنا لاوازی و پووکی ئەم جیهانەی پیشانمان دا! پێشانمانی دا کە زیاتر لە سەد ١٠٠ ملیۆن کەسی تر دەچنە ڕیزی هەرە هەژارەکانەوە لە جیهاندا کە ناتوانن دەستیان بگاتە خۆراکە سەرەکی و بنەڕەتیەکان کە بۆ مانەوەی ئینسان پێویستە لە ژیان! کۆرۆنا نا عەدالەتی و نایەکسانی کۆمەڵگاکانی خستەڕوو، لە ماوەی چەند مانگێکدا بۆ چەندەها ساڵ گەڕاندومانێتیە دواووە!
زەرەرمەندی یەکەم لەم کارەساتی کۆرۆنایەدا ، خەڵکانێکن کە خاوەن پێشەی ڕەسمی نین(ئەوانەی کاری ڕەسمی دەوڵەتیان نیە)، هەروەها بزنیسە بچوکەکان و ژنانن! لە جەنگی جهانی دووەمەوە داڕوخانی وا نەبووە! ئاستی هەژاری و برسێتی دەگاتە ئاستێکی مێژووی، کە لە مێژوودا وێنەی نەبووە!؟
ئەم پەتای کۆرۆنایە وەک سۆنەر یا گرتی ئەشعەی سینی وابوو، کە جێگە شکاوەکانی کۆمەڵگای بەشەری نیشانماندا! بۆمانی دەرخست کە وەهم و درۆ و دەلەسەی نەمانی ڕەگەزپەرستی و چینایەتی هەمووی ئێدیعا و تەبلیغاتی بێ بنەما بوون!؟ جیاوازی داهات و دەست ڕاگەیشتن بە کەرتی تەندروستی یەکسان نیە بۆ هەموو تاکەکانی کۆمەڵگا!؟ ملیۆنان کەس لە ماڵەکانیاندا دەمرن و بنکەی تەندروستی نیە بۆ تیمارکردنیان!؟
٢٦ بیست و شەش دەوڵەمەندی جیهان کە سەروەتی نیوەی خەڵکی ئەم گۆی زەویەیان هەیە، نیشانەیەکی تری نایەکسانی دابەشکردنی داهاتە لە جیهان، هەروەها تیرۆری جۆرج فلۆیدی ڕەش پێست و توڕەیی خەڵکی لە هەموو جێگەیەک، نیشانەیەکی تری توڕەیی خەڵکە لەم سیستەمە نایەکسانەی جیهان!؟
بۆیە پێویستمان بە بنیاتنانەوەیەکی تری جیهان هەیە، پێویستمان بە داڕشتنەوەیەکی تری بەرنامە و یاساکان هەیە کە پەیوەندی نێوان ئینسانەکان دیاری دەکات، دەنا دەیان و سەدان پەتا و کارەساتی تری دڵتەزێن چاوەڕوانمان دەکات.


rahman_awarekan@hotmail.com

Previous
Next